पुणे / वार्ताहर :
डेटिंगच्या नावाखाली वेगवेगळी कारणे देत गंडा घालण्याचे प्रकार वारंवार घडताना दिसून येतात. अशाचप्रकारे पुण्यातील एका 78 वर्षीय नागरिकास 1 कोटी 02 लाख रुपयांचा गंडा घालण्यात आल्याचा प्रकार उघडकीस आला आहे. याबाबत सायबर पोलीस ठाण्यात आरोपींवर गुन्हा दाखल केला आहे.
रजत सिन्हा, नेहा शर्मा अशी गुन्हा दाखल करण्यात आलेल्या आरोपींची नावे आहेत. पोलिसांनी दिलेल्या माहितीनुसार, ज्येष्ठ नागरिक असलेले तक्रारदार हे उच्चभ्रु घरातील असून त्यांना मे 2022 मध्ये नेहा शर्मा नावाच्या तरुणीने फोन करुन, के बी टेलीकॉम या डेटिंग कंपनीतून बोलत असून, डेटिंग सर्व्हिस देत असल्याची माहिती दिली. ही डेटिंग सेवा घेण्याकरिता सुरुवातीला काही पैसे कंपनीत भरावे लागतील असे सांगितले. त्यानंतर वेगवेगळी कारणे देत त्यांना रिफंडबेल चार्जेस असल्याचे सांगून वेगवेगळया खात्यात पैसे भरण्यास सांगण्यात आले. त्यानुसार ते आरोपींच्या विविध खात्यात पैसे भरत गेले. परंतु, त्यानंतर आरोपींनीच त्यांना तुम्ही बेकायदेशीरपणे डेटिंग सर्व्हीस घेण्याचा प्रयत्न केला आहे. समाजात तुमची बदनामी करु, तुमच्यावर पोलीस ठाण्यात गुन्हा दाखल करु अशी धमकी देऊन वर्षभर त्यांच्याकडून वेळोवेळी पैसे उकळण्यात आले. त्यानुसार त्यांनी आतापर्यंत एक कोटी दोन लाख रुपये आरोपींच्या खात्यावर भरले. अखेर सततच्या त्रासाला कंटाळून त्यांनी सायबर पोलिसांकडे धाव घेत आरोपी विरोधात तक्रार दाखल केली. त्यानंतर संबंधित प्रकार उघडकीस आला आहे. याबाबत पुणे सायबर पोलीस अधिक तपास करत आहेत.
अधिक वाचा : येरवडा कारागृहात कैद्यावर पत्र्याने वार
