पुणे / वार्ताहर :
बिटकॉइनमध्ये गुंतवणूक केल्यास चांगला परतावा मिळेल, असे आमिष दाखवून एका व्यावसायिकाला ऑनलाईन 1 कोटी 12 लाख 60 हजार रुपयांचा गंडा घालण्यात आल्याचा धक्कादायक प्रकार उघडकीस आला आहे. याप्रकरणी आरोपींवर सायबर पोलीस ठाण्यात गुन्हा दाखल करण्यात आल्याची माहिती पोलिसांनी दिली.
याबाबत हरिश्चंद्र राजाराम काळे (वय 46, रा. वडगाव शेरी, पुणे) यांनी आरोपी विरोधात सायबर पोलिसांकडे तक्रार दाखल केली आहे. त्यानुसार डॅनियल कूपर आणि अलेक्झांडर हूडहेड आणि आज्ञात दोन मोबाईलधारकांविरोधात गुन्हा दाखल करण्यात आला आहे. 20 सप्टेंबर 2021 पासून आत्तापर्यंत हा प्रकार घडलेला आहे.
पोलिसांनी दिलेल्या माहितीनुसार, आरोपी डॅनियल कूपर आणि अलेक्झांडर हुडहेड यांनी तक्रारदार हरिश्चंद्र काळे यांच्याशी मोबाईल व ईमेलद्वारे संपर्क केला. त्यांना टेडएक्स डॉट कॉम टेडिंग साईटमध्ये मधून बोलत असल्याचे भासवले. सदर वेबसाईटच्या माध्यमातून क्रिप्टो करन्सी असलेल्या बिटकॉइनमध्ये गुंतवणूक केल्यास, मोठय़ा प्रमाणावर परतावा मिळेल असे आमिष आरोपींनी दाखवले. त्यानुसार वेळोवेळी एकूण 1 कोटी 12 लाख 60 हजार रुपयांचे बिटकॉइन स्वीकारून स्वतःच्या आर्थिक फायद्यासाठी आरोपींनी त्याचा वापर करून तक्रारदारांची फसवणूक केली. याबाबत सायबर पोलीस स्टेशनच्या पोलीस निरीक्षक मिनल सुपे-पाटील पुढील तपास करत आहे.
