स्वातंत्र्यदिनानिमित्त आज राज्यभरात भरगच्च कार्यक्रम

पणजी : भारतीय स्वातंत्र्याचा 77 वा वर्धापनदिन आज गोव्यातही मोठ्या उत्साहात आणि भरगच्च कार्यक्रमांनिशी थाटात साजरा केला जाणार आहे. जुन्या सचिवालयानजीक राज्य पातळीवरील मुख्य सोहळ्यात मुख्यमंत्र्यांच्या हस्ते ध्वजारोहण होणार आहे. सकाळी 9.15 वा. हा सोहळा होईल. यावेळी मुख्यमंत्री पोलिसांकडून मानवंदना स्वीकारतील. अनेकांना पुरस्कार प्रदान करतील. तसेच राज्यातील जनतेला उद्देशून भाषण करतील. स्वातंत्र्यदिनानिमित्त म्हापसा, पेडणे, वाळपई, डिचोली, केपे, सांगे, काणकोण, मडगाव व वास्को तसेच धारबांदोडा येथे सरकारी पातळीवर ध्वजारोहण होईल. मान्यवर मंत्री व आमदारांच्या हस्ते तिरंगा फडकविला जाईल. पर्वरी येथे विधानसभा प्रकल्पासमोर सभापती रमेश तवडकर हे सकाळी 8.30 वा. तिरंगा फडकवतील. दिवसभर राज्यात आज भरगच्च कार्यक्रमांचे आयोजन करण्यात आलेले आहे. विविध स्पर्धांचेही आयोजन केले आहे.