काळ्या यादीतील गुन्हेगारांच्या घरांवर, छापे 70 घरांची तपासणी

बेळगाव : विधानसभा निवडणुकीच्या पार्श्वभूमीवर काळ्या यादीतील गुन्हेगारांच्या घरांवर छापे टाकण्यात आले. शुक्रवारी सकाळी बेळगाव पोलिसांनी ही कारवाई केली असून तब्बल 70 जणांच्या घरात तपासणी करण्यात आली आहे. कपिलेश्वर मंदिरनजीकच्या वसाहतीत एका तरुणाच्या घरी दोन तलवारी आढळल्या असून त्याच्यावर खडेबाजार पोलीस स्थानकात बेकायदा शस्त्रास्त्र बाळगल्याप्रकरणी एफआयआर दाखल करण्यात आला आहे. पोलीस उपायुक्त शेखर एच. टी. यांच्या नेतृत्वाखाली ही कारवाई करण्यात आली आहे. पोलीस आयुक्त डॉ. एम. बी. बोरलिंगय्या यांच्या मार्गदर्शनाखाली काळ्या यादीतील 70 गुन्हेगारांच्या घरांवर छापे टाकण्यात आले. या कारवाईत गुन्हे तपास विभागाचे एसीपी सदाशिव कट्टीमनी, खडेबाजारचे एसीपी अरुण कोळूर, बेळगाव ग्रामीणचे एसीपी गोपालकृष्ण गौडर, मार्केटचे एसीपी प्रशांत सिद्दनगौडर यांच्यासह शहरातील बहुतेक पोलीस निरीक्षक, उपनिरीक्षकांनी भाग घेतला होता. भयमुक्त वातावरणात निवडणूक प्रक्रिया पार पाडण्यासाठी व बेळगावात कायदा व सुव्यवस्था परिस्थिती अबाधित ठेवण्यासाठी आवश्यक खबरदारी घेण्यात येत असून या पार्श्वभूमीवर काळ्या यादीतील गुन्हेगारांच्या घरांवर छापे टाकून तपासणी करण्यात आल्याची माहिती पोलीस उपायुक्त शेखर एच. टी. यांनी दिली. केवळ बेळगाव शहरच नव्हे तर तालुक्यातील काही गावांमध्येही कारवाई करण्यात आली आहे. काळ्या यादीतील गुन्हेगारांनी आपल्या घरात शस्त्रs बाळगली आहेत का? निवडणुकीच्या काळात सध्या त्यांचे काय चालले आहे? गुन्हेगारी कारवायात त्यांचा सहभाग आहे का? आदीविषयी माहिती मिळविण्यासाठी ही मोहीम राबविण्यात आली आहे.