ताशिलदार गल्ली येथील जुने लोखंडी विद्युत खांब बदलले

बेळगाव : शहरातील जुने लोखंडी विद्युत खांब बदलण्याची मोहीम हेस्कॉमकडून सुरू आहे. सोमवारी ताशिलदार गल्ली येथे लोखंडी खांब काढून त्या ठिकाणी काँक्रिटचे वीजखांब बसविण्यात आले. लोखंडी विद्युतखांबांमुळे वरचेवर वीजप्रवाह प्रवाहित होत असल्याने नागरिकांना सौम्य विजेचे धक्के बसत होते. कोणताही मोठा अनर्थ घडण्यापूर्वी हे सर्व वीजखांब हेस्कॉमकडून बदलण्यात आले. 25 ते 30 वर्षांपूर्वी शहरात लोखंडी खांब बसविण्यात आले होते. त्याचबरोबर वीजवाहिन्या ओढण्यात आल्या होत्या. परंतु, हे लोखंडी खांब आता जीर्ण झाले आहेत. काही ठिकाणी खांबांना गंज लागला असल्याने ते केव्हा कोसळतील, याची शाश्वती नाही. वीजखांब बदलावेत यासाठी नागरिकांकडून तक्रारी येत होत्या. याची दखल घेऊन सोमवारी ताशिलदार गल्ली परिसरातील लोखंडी खांब काढून त्या ठिकाणी सिमेंटचे वीजखांब बसविण्यात आले. स्थानिक नगरसेविका वैशाली भातकांडे यांनी काही दिवसांपूर्वी हेस्कॉम अधिकाऱ्यांना या समस्येची माहिती दिली होती. पावसाळ्याच्या दिवसात वीजखांबांमधून वीजप्रवाह प्रवाहित होण्याच्या घटना घडत होत्या. याची दाखल घेऊन हेस्कॉम शहर विभागाच्यावतीने वीजखांब बदलण्यात आले. त्यामुळे परिसरातील नागरिकांनी समाधान व्यक्त केले आहे.