कुर्टी सरपंचाविरुद्ध अविश्वास ठराव संमत

फोंडा : कुर्टी खांडेपार पंचायतीचे सरपंच नावेद तहसीलदार यांच्या विरुद्ध दाखल करण्यात आलेला अविश्वास ठराव 6 विरुद्ध 1 मताने संमत झाला. ठरावावर चर्चा करण्यासाठी सोमवारी सकाळी कुर्टी पंचायत कार्यालयात बैठक झाली. चर्चेनंतर मतदान घेण्यात आले. 11 पैकी 6 पंचसदस्यांनी ठरावाच्या बाजूने तर 1 पंचसदस्याने ठरावाच्या विरोधात मतदान केले. उपसरपंच विल्मा पेरेरा, पंचसदस्य अभिजीत गावडे, हरिष नाईक, साजिदा बी सय्यद, संजना नाईक व मनीष नाईक या पंचसदस्याने ठरावाच्या बाजूने तर निळकंठ नाईक यांनी ठरावाच्या विरोधात मतदान केले. मतदानानंतर पंचसदस्य भिका केरकर यांनीही या सहा जणांना पाठिंबा जाहीर केला. सरपंच नावेद तहसीलदार, पंचसदस्य परवीन बानो तहसीलदार व बाबू च्यारी हे बैठकीला अनुपस्थित राहिले. सरपंच नावेद तहसीलदार हे गेल्या दहा महिन्यापासून पंचायत मंडळाला विश्वासात न घेताच विकासकामासंबंधी निर्णय घ्यायचे. नवीन पंचायत मंडळ स्थापन झाल्यापासून या दहा महिन्यात एकही नवीन विकासकाम झालेले नाही. त्यामुळे आपण त्यांचा पाठिंबा काढून घेतला व सत्ताधारी भाजपा समर्थक पंच सदस्यांना पाठिंबा देण्याचा निर्णय घेतला.  फोंड्याचे आमदार व कृषीमंत्री रवी नाईक यांच्या पाठिंब्याने कुर्टी पंचायत क्षेत्रात सर्व प्रलंबित विकासकामे मार्गी लावण्यासाठी सत्ताबदल आवश्यक असल्याचे त्यांनी प्रसार माध्यमांसमोर बोलताना सांगितले. हरिष नाईक यांनी कुर्टी पंचायत क्षेत्रात विकासकामे होण्यासाठी हा निर्णय घेण्यात आल्याचे सांगितले.