वाढत्या रस्ते अपघातांमुळे नितीन गडकरी चिंतित

नवी दिल्ली : संसदेच्या हिवाळी अधिवेशनादरम्यान केंद्रीय रस्ते वाहतूक मंत्री नितीन गडकरी यांनी गुरुवारी सभागृहात महत्त्वपूर्ण भाष्य केले. जेव्हा जेव्हा मी आंतरराष्ट्रीय परिषदेत सहभागी होण्यासाठी जातो आणि तेथे रस्ते अपघातांबाबत चर्चा होत असताना मी तोंड लपवण्याचा प्रयत्न करतो, असे लोकसभेत रस्ते अपघातांवरील चर्चेदरम्यान गडकरी म्हणाले. जगातील सर्वाधिक रस्ते अपघातांची नोंद भारताच्या नावावर आहे. स्वीडनने रस्ते अपघात शून्यावर आणले आहेत आणि इतर अनेक देशांनीही ते कमी केले आहेत. मी अतिशय पारदर्शक आहे म्हणूनच मी सांगत आहे की, जेव्हा मी रस्ते वाहतूक मंत्रालयाचा कार्यभार स्वीकारला तेव्हा मी 2024 पर्यंत रस्ते अपघात आणि त्यामुळे होणारे मृत्यू 50 टक्क्यांपर्यंत कमी करण्याचे लक्ष्य ठेवले होते. पण, अपघात कमी करायचे विसरा, ते वाढले हे मान्य करायला मला लाज वाटत नाही. त्यामुळे कोणत्याही आंतरराष्ट्रीय परिषदेत जेव्हा रस्ते अपघातांची चर्चा होते तेव्हा मी तोंड लपवण्याचा प्रयत्न करतो, अशी कबुली केंद्रीय मंत्री गडकरी यांनी दिली.