मुरगुड, वार्ताहर
Kolhapur rain Update : मुरगुड शहरासह परिसरात गेले चार दिवस सुरु असलेल्या संततधार वृष्टीमुळे वेदगंगा नदीच्या पाणी पात्रात मोठी वाढ झाली आहे. गेल्या दोन दिवसापूर्वीच पाणी पात्राबाहेर पडले आहे. पावसाचा जोर कायम राहिल्याने निपाणी-देवगड रस्त्यावर मुरगुड नजिक स्मशान शेडजवळच्या रस्त्यावर महापुराचे पाणी आले आहे. त्यामुळे निपाणी -राधानगरी आंतरराज्य महामार्गावर येथून होणारी वाहतूक बंद झाली आहे.
सध्या मुरगुड निढोरी दरम्यान असणाऱ्या मुरगुड च्या स्मशान शेड जवळ रस्त्यावर अंदाजे फुटभर पाणी आले आहे.एवढ्या पाण्यातून वाहतूक करणे सहज शक्य होते.पण याच ठिकाणी रस्त्याचे काम सुरू आहे.रस्ता काँक्रिटीकरणासाठी एका बाजूला खोदला गेला आहे तर दुसऱ्या एकेरी बाजूनेच या ठिकाणी वाहतूक सुरू होती काँक्रिटी करणासाठी ऐन पावसाळ्यात महापूर सदृश्य कालावधीत रस्ता खोदल्या मुळे प्रवासी वर्गात तीव्र नाराजी पसरली आहे.असाच पावसाचा जोर कायम राहिला तर या ठिकाणी पाण्याची पातळी वाढू शकते दोन्ही बाजूला टाकलेला भराव पाण्याच्या विसर्ग होण्यास अडचणीचा ठरत आहे.
वेदगंगा नदीच्या पाणीपत्रात वाढ झाल्याने नदीवरील सहा बंधारे पाण्याखाली गेले आहेत. या बंधाऱ्या वरून होणारr वाहतूक तीन दिवसांपूर्वीच बंद झाली आहे. नागरीक पर्यायी मार्गाचा वापर करून मुरगुडला ये-जा करत होते. पण पर्यायी मार्गही बंद झाल्याने आता मुरगुडचा संपर्क तुटला आहे. नागरिकांनी जीव धोक्यात घालून प्रवास करू नये अशी विनंती प्रशासनाने केली.
