बेळगाव : शहरातील कचऱ्याची उचल करण्यासाठी महापालिकेकडून कोट्यावधी रुपयांचा निधी खर्च केला जातो. त्यातच आता कचऱ्याचे वर्गीकरणही केले जात आहे. मात्र, नार्वेकर गल्ली येथील कार पार्किंगच्या कोपऱ्यावर मोठ्या प्रमाणात कचरा टाकण्यात आला असला तरी त्याची उचल करण्याकडे दुर्लक्ष करण्यात आले आहे. विशेष म्हणजे या कचऱ्याच्या ढिगात दारूची पाकिटेही मोठ्या प्रमाणात टाकण्यात आली आहेत. महापालिकेच्या सफाई कामगारांकडून शहर व उपनगरात ठिकठिकाणी कचऱ्याची उचल केली जाते. पहाटेपासूनच कचऱ्याची उचल करण्याचे काम सुरू असते. स्वच्छ आणि सुंदर बेळगाव बनविण्यासाठी प्रयत्न सुरू असतानाच काही ठिकाणी मात्र कचऱ्याची वेळेत उचल होत नसल्याने नागरिकांतून नाराजी व्यक्त केली जात आहे. कचऱ्याचे वर्गीकरण करून देण्यात यावे, यासाठी जनजागृती केली जात आहे. पण शहरात मुख्य गल्ल्यांमध्ये टाकलेला कचरा उचल होत नसल्याने आश्चर्य व्यक्त केले जात आहे. गेल्या काही दिवसांपासून नार्वेकर गल्लीतील कार पार्किंगच्या कोपऱ्यावर मोठ्या प्रमाणात कचरा टाकण्यात आला आहे. या कचऱ्यावर मोकाट कुत्र्यांचा वावरही वाढला असून दारूच्या पाकिटांचा ढीग पडल्याचेही दिसून येत आहे. त्यामुळे तातडीने कचऱ्याची उचल करावी, अशी मागणी केली जात आहे.
Tarun Bharat Portal
Amit Kulkarni a versatile content writer, scriptwriter, and content producer at Tarun Bharat Media. Specializes in sports news, local news entertainment, national news and astrology content. His captivating storytelling and deep industry knowledge make him an expert in crafting engaging narratives.
Related Posts
