राष्ट्रवादीच्या माजी नगरसेवकांनी उपमुख्यमंत्री अजित पवार, मंत्री हसन मुश्रीफ यांच्या अभिनंदनाचे मोठे पोस्टर्स शहरात लावले आहेत
संजीव खाडे कोल्हापूर
राष्ट्रवादीतील उभ्या फुटीनंतर कोल्हापूर महापालिकेतील पदाधिकारीपद भूषविलेल्या बहुतांश माजी नगरसेवकांची मंत्री हसन मुश्रीफ यांच्याबरोबरच जाण्याचा निर्णय घेतला आहे. गेले दोन दिवस शांत आणि व्दिधामन:स्थितीत असणाऱ्या माजी नगरसेवकांनी आता हळूहळू आपले मौन सोडत मुश्रीफच आमचे नेते, त्यांनी आमचे करिअर घडविले, कठिण प्रसंगी त्यांनी आम्हाला साथ दिली. त्यामुळे आता त्यांच्याबरोबरच राहणे संयुक्तिक वाटते, अशी खासगी प्रतिक्रिया देत माजी नगरसेवकांनी थोरल्यासाहेबांपेक्षा मुश्रीफ यांचा हात धरून उपमुख्यमंत्री अजितदादांच्या बाजूने जाण्याचा निर्णय घेतला असल्याचे सांगितले.
कोल्हापूर महापालिकेवर गेली दहा वर्षे सतेज पाटील यांच्या नेतृत्वाखालील काँग्रेस आणि हसन मुश्रीफ यांच्या नेतृत्वाखालील राष्ट्रवादीची सत्ता आहे. पाटील-मुश्रीफ यांनी त्यावेळी उद्धव ठाकरेंच्या शिवसेनेला बरोबर घेत सत्ता आपल्याकडे राखली. गेल्या दोन्ही सभागृहात राष्ट्रवादीचे किमान चौदा पंधरा नगसेवक निवडून आले. मुश्रीफांनी या नगसेवकांना राजकीय, आर्थिक बळ दिले. तसेच मंत्रीपद असताना निधीही दिला. शहरात राष्ट्रवादीचे मुश्रीफांच्या तोडीचे नेतृत्वही तयार झाले नाही. किंबहुना राजकीय सत्ताकारणात शहरात स्थानिक मोठे नेतृत्व तयार होणार नाही याचीही दक्षता घेतली गेल्याचे सांगितले जाते. वीस वर्षांतील राजेश लाटकरांचा अपवाद वगळता माजी महापौर आर. के. पोवार राष्ट्रवादीचे शहराध्यक्ष राहिले, पण त्यांच्या कार्यकाळात मुश्रीफांच्या आदेशानेच राष्ट्रवादीची वाटचाल सुरू राहिली. त्यामुळे कागलमधील आदेशाने कोल्हापूर महापालिकेतील नगरसेवकांची आणि शहरातील पदाधिकाऱ्यांची वाटचाल राहिली. आता मुश्रीफ अजितदादांबरोबर गेल्याने शरद पवार यांच्या राष्ट्रवादीचे नेतृत्व आर. के. पेवार यांच्याकडे आले आहे. पण त्यांच्या नेतृत्वाला मर्यादा आहेत. त्यामुळे शहरातील राष्ट्रवादीचे बहुतांश माजी नगरसेवक, पदाधिकारी मुश्रीफ यांच्याबरोबर जाणार हे स्पष्ट झाले आहे.
या माजी नगरसेवकांचा कल मुश्रीफांकडे
माजी उपमहापौर महेश सावंत, माजी स्थायी समिती सभापती आदिल फरास, माजी स्थायी समिती रमेश पोवार, माजी नगरसेवक प्रकाश गवंडी, अजित राऊत, संदीप कवाळे, वहिदा सौदागर, सुनील पाटील, उत्तम कोराणे यांचा कल मंत्री मुश्रीफांकडे आहे.
लाटकर, पाटील, फाळके काय करणार?
माजी स्थायी समिती सभापती राजेश लाटकर, सचिन पाटील आणि माजी नगरसेवक विनायक फाळके हे काय करणार याकडे साऱ्यांच्या नजरा आहेत. ज्या भाजप आणि महाडिक गटाविरोधात विरोधात वैचारिक भूमिका घेत प्रभावी भाषण करणाऱ्या राजेश लाटकर यांना कोणत्या पवारांचा झेंडा हाती घ्यायचा असा प्रश्न आहे. कारण मुश्रीफांबरोबर गेल्यास त्यांना भाजपच्या नेत्यांच्या जवळ बसावे लागणार आहे. विनायक फाळके स्थिती देखील लाटकर यांच्यासारखी आहे.
काका काकांकडे तर पुतण्या पुतण्याकडे; आर. के. पोवार, रमेश पोवार यांच्या स्वतंत्र भूमिका
शरद पवार यांचे निकटवर्तीय म्हणून ओळख असलेल्या राष्ट्रवादीचे शहराध्यक्ष माजी महापौर आर. के. पोवार यांनी फुटीनंतर शरद पवार यांच्याबरोबर राहणार असल्याचे स्पष्ट केले आहे. मात्र त्यांचा पुतण्या माजी स्थाथी समिती सभापती रमेश पोवार यांनी मात्र आपण मुश्रीफसाहेबांबरोबर राहणार असल्याचे मंत्री मुश्रीफांच्या अभिनंदनाचे पोष्टर लावून एकप्रकारे स्पष्ट केले आहे. त्यामुळे शहरात काका आर. के. पोवार हे काका शरद पवार यांच्याबरोबर तर आर. के. यांचा पुतण्या शरद पवार यांचे पुतणे उपमुख्यमंत्री अजित पवारांबरोबर अशी चर्चा रंगली आहे.
शहरात झळकले फलक, भव्य पोस्टर
शहरात आदिल फरास, रमेश पोवार यांनी उपमुख्यमंत्री अजित पवार, मंत्री हसन मुश्रीफ यांच्या अभिनंदनाचे पोस्टर झळकवून आपली वाटचाल स्पष्ट केली आहे. येत्या दोन तीन दिवसांत इतर माजी नगरसेवक, पदाधिकारीही पोस्टर लावणार असल्याची चर्चा आहे.
हसन मुश्रीफ यांनी आम्हा नगरसेवकांना महापालिकेतील पदे दिली. निधी दिला. कार्य करण्याची संधी दिली. आमच्या कठिण प्रसंगी त्यांनी आम्हाला साथ दिली. त्यांच्या कठिण काळात आम्ही त्यांच्याबरोबर होतो. आता ते मंत्री झाले आहेत. त्यांच्याबरोबर राहणार आहोत.
महेश सावंत, माजी उपमहापौर, कोल्हापूर महापालिका.
