चाईबासा येथे आयईडी स्फोटात 3 जवान जखमी
वृत्तसंस्था/ रांची
झारखंडमधील पश्चिम सिंहभूम जिल्ह्यातील सारंडा जंगलात नक्षलवाद्यांनी सुरक्षा दलांवर बुधवारी मोठा हल्ला केला. छोटानागरा पोलीस स्टेशन परिसरातील बालीबा आणि बाबुडेरा दरम्यान चाईबासा येथे नक्षलवाद्यांनी केलेल्या आयईडी स्फोटात तीन जवान जखमी झाले. जखमी सैनिकांना ताबडतोब हेलिकॉप्टरने रांची येथे नेण्यात आले असून त्यांच्यावर उपचार सुरू आहेत.
सुरक्षा दल नक्षलविरोधी कारवाई करत असताना बुधवार, 5 मार्च रोजी सकाळी 8:40 वाजता नक्षलवाद्यांनी बालीबा परिसरात आयईडीचा स्फोट घडवून आणला. या हल्ल्यात बटालियन 197 चे असिस्टंट कमांडंट जी. जे. साई, हवालदार कम रेडिओ ऑपरेटर व्ही. टी. राव आणि कॉन्स्टेबल जी. डी. धर्मेंद्र हे तिघेजण जखमी झाले. 4 मार्चपासून सुरू झालेल्या नक्षलविरोधी कारवाईअंतर्गत विशेष संयुक्त पथकांनी छोटानागरा आणि जरीकेला पोलीस स्टेशन परिसरातील सीमावर्ती जंगले आणि डोंगराळ भागांना वेढा घातला होता. यादरम्यान ही हल्ल्याची घटना घडली आहे. तीन जखमी सैनिकांना घटनास्थळी प्राथमिक उपचार दिल्यानंतर हेलिकॉप्टरने रांचीला पाठवण्यात आले असून त्यांच्यावर उपचार सुरू आहेत. डीजीपी अनुराग गुप्ता यांनी रुग्णालयात जाऊन जखमींच्या प्रकृतीची विचारपूस केली. यावेळी राज्यातील नक्षलवादी आपले अंतिम श्वास मोजत आहेत. गरज पडल्यास जखमी सैनिकांना दुसऱ्या ठिकाणी नेले जाईल, असे डीजीपी अनुराग गुप्ता म्हणाले.
नक्षलवाद्यांवर कारवाईचे सत्र सुरूच
गेल्या काही दिवसांपासून पश्चिम सिंहभूममध्ये नक्षलवाद्यांवर सतत शोधमोहीम राबवली जात आहे. दरम्यान, मंगळवारी जिल्हा पोलीस आणि सीआरपीएफ-60 बटालियनच्या जवानांना नक्षलवाद्यांविरुद्ध मोठे यश मिळाले. टोंटो पोलीस स्टेशन हद्दीतील वनग्राम हुसिपी जवळील जंगल आणि डोंगराळ भागात नक्षलवाद्यांच्या ढिगाऱ्यातून स्फोटके आणि शस्त्रs जप्त करण्यात आली. बॉम्ब निकामी पथकाच्या मदतीने जप्त केलेली स्फोटके घटनास्थळीच नष्ट करण्यात आली. तसेच नक्षलवादी तळही उद्ध्वस्त करण्यात आला. येथेही नक्षलवाद्यांनी सुरक्षा दलांना लक्ष्य करण्यासाठी स्फोटके पेरली होती.
