बार्देशात नवरात्रोत्सवाला उत्साहात प्रारंभ

म्हापसा : बार्देशात भक्तिभावाने घटस्थापना होऊन ठिकठिकाणी नवरात्रोत्सवाला प्रारंभ झाला आहे. मंदिरे, सरकारी शाळा, विविध सार्वजनिक मंडळाच्या मंडपात दुर्गामाता तसेच सरस्वती पूजन झाले. त्याचप्रमाणे म्हापसा परिसरात सार्वजनिक कृष्ण पूजन व खोर्ली भागात घरोघरी कृष्ण पूजन करण्यात आले. बार्देश तालुक्यात नवरात्रोत्सवानिमित्त विविध ठिकाणी सलग नऊ दिवस विविध सांस्कृतिक व दांडिया स्पर्धेचे आयोजन करण्यात आले आहे. विशेषत: सेवाभावी संस्थांतर्फे दरवर्षीप्रमाणे यंदाही अखिल गोवा दांडिया करब स्पर्धेचे आयोजन करण्यात आले आहे. खोर्ली म्हापसा भागात घरोघरी प्रथेनुसार कृष्ण पूजनाचा कार्यक्रम पार पडला. या प्रथेनुसार काहीजण दसरा तर काही लोक दिवाळी दिवशी श्रीकृष्ण मूर्तीचे विसर्जन करतात. अन्साभाट म्हापसा येथील श्रीकृष्ण पूजनाचे यंदा सुवर्ण महोत्सवी वर्ष असल्याने विविध स्पर्धेचे आयोजन करण्यात आले आहे. काणका येथील विश्वाटी विश्वेश्वर शिवशंकर मंदिरात दुर्गामातेच्या मूर्तीचे सौ. आनंदी पांढरे व आनंद पांढरे या दांम्पत्यांच्या हस्ते विधिवत पूजन झाले. स्व. वासू पांढरे यांच्या स्मरणार्थ ही मूर्ती आनंद पांढरे आणि कुटुंबियांनी अपर्ण केली आहे. दरम्यान, 16 ऑक्टोबर रोजी उदय पांढरे यांच्या नेतृत्वाखाली आत्माराम भगत, देविदास भगत, सतीश वेंगुर्लेकर, सुदेश हळदणकर, चंद्रकांत साळगावकर, उल्हास खोत, मंगलदास शिरोडकर यांच्या वतीने नवरात्रोत्सव साजरा होणार आहे.