बेळगावच्या महिला कल्याण संस्थेला राष्ट्रीय पुरस्कार

बेळगाव : येथील प्रतिष्ठित महिला कल्याण संस्थेला फंक्शनल वोकेशनल ट्रेनिंग अॅण्ड रिसर्च सोसायटीचा (एफव्हीटीआरएस) राष्ट्रीय पुरस्कार लाभला आहे. बेंगळूर येथे नुकत्याच झालेल्या राष्ट्रीय कौशल्य मेळा 2025 मध्ये संस्थेचे कार्यकारी संचालक फेलिक्स डिसोजा यांच्या हस्ते महिला कल्याण संस्थेच्या मानद सचिव वैजयंती चौगला यांना पुरस्कार व प्रमाणपत्र देऊन गौरविण्यात आले. महिला कल्याण संस्थेने समाजासाठी समर्पण भावनेतून केलेली सेवा, युवावर्गासाठी कौशल्यावर आधारित प्रशिक्षण, जीवन कौशल्य, व्यवसाय प्रशिक्षण आदी क्षेत्रांत केलेल्या उल्लेखनीय कार्याची दखल घेत राष्ट्रीय पुरस्कार प्रदान करण्यात आला. पुरस्कार प्रदान समारंभप्रसंगी देशातील विविध सेवा-संस्थांचे प्रतिनिधी, एफव्हीटीआरएसचे जिम्मी मॅथन्य, दिव्यानेएल, बेळगावचे बसवराज मन्नीकेरी आदी उपस्थित होते.