नाथाजीराव हलगेकर स्मृतिदिनी शैक्षणिक कार्यशाळा उत्साहात

बेळगाव : शिक्षणमहर्षी कै. नाथाजीराव गुरुआण्णा हलगेकर यांच्या स्मृतिदिनानिमित्त मराठा मंडळ संस्थेने एकदिवसीय शैक्षणिक उपक्रमांच्या कार्यशाळेचे आयोजन केले होते. कार्यक्रमाच्या अध्यक्षस्थानी मंडळाचे अध्यक्ष राजेश हलगेकर होते. व्यासपीठावर संचालक व विश्वस्त कमिटीचे सभासद उपस्थित होते. जिजामाता हायस्कूलच्या विद्यार्थिनींनी ईशस्तवन सादर केले. मान्यवरांच्या हस्ते नाथाजीराव हलगेकर यांच्या प्रतिमेचे पूजन करण्यात आले. संचालक रामचंद्र मोदगेकर यांनी नाथाजीरावांचा जीवनपट उलगडला. प्राचार्य एस. एस. पाटील यांनी प्रास्ताविक व स्वागत केले. राजेश हलगेकर यांनी नाथाजीरावांच्या आठवणींना उजाळा दिला. त्यांच्याच पावलावर पाऊल ठेवून संस्थेच्या अध्यक्षा डॉ. राजश्री नागराजू शिक्षणसेवेचा वसा पुढे चालवत असल्याचे त्यांनी सांगितले. डी. टी. सावंत यांनी आभार मानले. शैक्षणिक उपक्रमाच्या पहिल्या सत्रात डॉ. राजन गवस यांचे ‘विद्यार्थ्यांच्या प्रतिमेचा खरा शिल्पकार शिक्षकच!’ या विषयावर व्याख्यान झाले. दुसऱ्या सत्रात मोहन पाटील व सतीश पाटील यांची ‘ते मागे का?’ या विषयावर व्याख्याने झाली. मुख्याध्यापक विश्वजीत हसबे, एन. डी. पाटील, घुग्रेटकर व अनिल कदम यांनी परिचय व सन्मान केला. सूत्रसंचालन प्रभारी प्राचार्य अरविंद पाटील यांनी केले. यावेळी संस्थेचे संचालक, विश्वस्त, शाळा-कॉलेजमधील शिक्षक व कर्मचारी उपस्थित होते.