राजापूर :
तालुक्यातील नाटे येथे जडीबुटी देऊन हजारो रूपये लाटण्याचा प्रयत्न करणाऱ्या टोळक्याला नाटे ग्रामस्थांनी इंगा दाखवत घरचा रस्ता दाखवला. या प्रकारामुळे नाटे येथे काही काळ तणावाची स्थिती निर्माण झाली होती, मात्र पोलिसांनी वेळीच हस्तक्षेप करून परिस्थितीवर नियंत्रण मिळविले.
नाटे येथे गेल्या काही दिवसांपासून जडीबुटी आणि आयुर्वेदिक उपचार करणारी एक गाडी उभी होती. येणाऱ्या जाणाऱ्यांकडून आयुर्वेदिक आणि जडीबुटी औषधोपचाराच्या नावाखाली पैसे घेतले जात होते. अशाच प्रकारे साखरी नाटे येथील एका युवकाकडून आयुर्वेदिक उपचाराच्या नावाखाली जवळपास 80 ते 85 हजार ऊपये लाटण्यात आले होते. त्याच्याकडून अजूनही 40 ते 45 हजार ऊपयाची मागणी केली जात होती आणि पैसे नसल्यास किमान अर्धा तोळे सोने घेऊन या असे सांगितले. तसेच हे औषध घेत असताना किंवा उपचार चालू असताना कोणालाही काही समजता कामा नये असे हे सांगण्यात आले होते.
ग्रामस्थांनी नाटे भागात सुरू असलेली ही जडीबुटीची विक्री तात्काळ थांबववली आणि फसवणूक झालेल्या त्या युवकाचे पैसे देण्यास भाग पाडले. एवढेच नव्हे तर या परिसरात पुन्हा गाडी लावायची नाही अशी तंबीही देण्यात आली.
नाटे येथे व्यवसाय करणाऱ्या या लोकांकडे कोणत्याही प्रकारचे जडीबुटी किंवा आयुर्वेदिक उपचार करण्यासाठी आवश्यक परवाना किंवा प्रमाणपत्र नसल्याचेही आढळून आले. स्थानिक प्रशासनाने तसेच पोलीस पाटील यांनी दक्ष राहून आपल्या गावात विनापरवानगी व्यवसाय करणाऱ्या अशा व्यावसायिकांवर कारवाई करावी अशी मागणी होत आहे.
- सापळा रचून विचारला जाब
45 हजार ऊपये नसल्यामुळे त्या युवकाने आपल्याच एका नातेवाईकाकडे मागणी केली होती. त्या नातेवाईकाच्या माध्यमातून घरच्या लोकांना तसेच काही मित्रांना समजल्यावर त्यांनी सापळा रचून जडीबुटी विकणाऱ्या या लोकांना जाब विचारण्याचा प्रयत्न केला. मात्र त्यांना अरेरावी आणि उडवाउडवीची उत्तरे दिल्यामुळे त्या भागात मोठ्या प्रमाणावर जमाव गोळा झाला. जमावातून काहींनी त्यांना येथेच प्रसाद देण्याचाही प्रयत्न केला. मात्र नाटे पोलिसांना ही गोष्ट समजतात त्यांनी तात्काळ घटनास्थळी धाव घेऊन परिस्थितीवर नियंत्रण मिळवले.
