आमंत्रण पत्रिका छपाईसाठी धडपड : घरांची डागडुजी-रंगकामात ग्रामस्थ व्यस्त
वार्ताहर/नंदगड
नंदगड ता. खानापूर येथील ग्रामदेवता श्री लक्ष्मीदेवी यात्रा तब्बल 25 वर्षानंतर होणार आहे. त्या निमित्त लक्ष्मीदेवी यात्रोत्सव कमिटीतर्फे कार्यक्रम पत्रिका जाहीर करण्यात आली आहे. कार्यक्रम पत्रिकेनुसार नागरिक आपापली आमंत्रण पत्रिका छापून घेण्यासाठी धडपड करीत आहेत.बुधवार दि. 12 फेब्रुवारी 2025 रोजी पहाटे 3 ते 7 वाजेपर्यंत होम व अभिषेक, सकाळी 7.11 मिनिटानी सूर्योदयाला अक्षतारोपण. त्यानंतर लक्ष्मी देवीचे मानाच्या मंदिरांना भेटी, दुपारी 12 वा. जुनेगाव, वतनदार व मानकरी यांची भेट व ओटी समारंभ, दि. 13 रोजी नंदगड गावातील ओट्या समारंभ, दि. 14 रोजी ओट्या भरणेचा कार्यक्रम, शनिवार दि. 15 रोजी गावातील ओट्या भरणेचा कार्यक्रम सकाळी 11 ते 2 वाजेपर्यंत लक्ष्मीदेवीचे रथावर विराजमान, दुपारी 3 ते 7 वा. पर्यंत रथोत्सवाला सुरवात. रविवार दि. 16 रोजी सकाळी 9 ते सायंकाळी 4 पर्यंत रथोत्सव व देवी गदगेवर विराजमान होणार आहे.
सोमवार दि. 17 फेब्रुवारी रोजी महाआरती, पूजा कार्यक्रम, श्री लक्ष्मीदेवीचे दर्शन, ओट्या, श्रीफळ वाढविणे, दुपारी 2 वा. कुस्ती मैदान होणार आहे. मंगळवार दि. 18 ते शुक्रवार दि. 21 पर्यंत रोज पूजा व ओट्या भरणे कार्यक्रम होणार आहे. शनिवार दि. 22 रोजी श्री लक्ष्मी देवीच्या सभोवती सवाद्य आंबिल गाडे फिरविण्यात येणार आहेत. रविवार दि. 23 रोजी सायंकाळी 4 वाजता देवीला गदगेवरुन उठवून मिरवणूक व सीमेकडे प्रयाण आदी कार्यक्रम होऊन यात्रेची सांगता होणार आहे. मंगळवार दि. 25 रोजी श्री लक्ष्मी देवीची मंदिरात प्रतिष्ठापना व ग्रामस्थांच्या ओट्या भरणेचा कार्यक्रम होणार आहे. यात्रा अवघ्या 27 दिवसावर येऊन ठेपल्याने यात्रेची तयारी करण्यात ग्रामस्थ गुंतले आहेत. गेल्या दोन महिन्यापासून घरांची डागडुजी व घराना रंगरंगोटी देण्याची कामे सुरू आहेत. त्यामुळे नंदगड ग्रामस्थ पूर्णत: कामात व्यस्त आहेत.
