मनपा सार्वजनिक बांधकाम स्थायी समितीची आज पुन्हा बैठक

बेळगाव : दोन दिवसांपूर्वी सार्वजनिक बांधकाम स्थायी समितीची बैठक झाली होती. मात्र या बैठकीमध्ये निधी वाटपावरून बराच गोंधळ उडाला होता. त्यामुळे कोणताच निर्णय घेण्यात आला नाही. परिणामी पुन्हा शुक्रवारी सकाळी 11 वाजता बैठक घेण्याचा निर्णय सार्वजनिक बांधकाम स्थायी समितीच्या चेअरमननी घेतला आहे. मंगळवार दि. 16 रोजी सार्वजनिक बांधकाम स्थायी समितीची बैठक झाली होती. या बैठकीमध्ये निधी वाटपावरून चेअरमन आणि विरोधी गटाच्या नगरसेवकांमध्ये जोरदार वादावादी झाली होती. दक्षिण भागातील एका प्रभागाला 30 लाख रुपये देण्याचा प्रस्ताव करण्यात आला. मात्र विरोधी गटनेत्यांनी आक्षेप घेतला होता. जवळपास एक तासाहून अधिकवेळ यावर चर्चा झाली होती. त्यामुळे कोणतेच ठराव मंजूर झाले नाहीत. शुक्रवार दि. 19 रोजी सकाळी 11 वाजता बैठक होणार असून मागील बैठकीमध्ये झालेल्या विषयांचे वाचन करून त्यांना मंजुरी दिली जाणार आहे. याचबरोबर चेअरमनांच्या परवानगीने इतर विषयांवरही चर्चा होणार आहे. नुकत्याच झालेल्या बैठकीमध्ये केवळ चर्चा झाली. त्याला जोरदार विरोध करण्यात आला. त्यामुळे पुन्हा एकदा बैठक घेऊन मागील सर्व विषय मंजूर केले जाणार आहेत. आता सत्ताधारी व विरोधी गटातील नगरसेवक कोणती भूमिका घेणार, हे पहावे लागणार आहे.