कचरा वर्गीकरण जागृतीसाठी मनपाकडून वाहनाची सुरुवात

बेळगाव : कचऱ्याचे वर्गीकरण करण्यात यावे, यासाठी जनजागृती केली जात असली तरीही अद्याप म्हणावा तसा प्रतिसाद मिळत नसल्याने मनपाकडून आता फ्लेक्सच्या माध्यमातून फिरत्या वाहनाद्वारे जागृतीचे काम हाती घेण्यात आले आहे. या वाहनाचा 26 जानेवारी रोजी प्रजासत्ताक दिनानिमित्त महापौर, उपमहापौर आणि मनपा आयुक्तांच्या हस्ते शुभारंभ करण्यात आला. स्वच्छ आणि सुंदर बेळगाव बनवण्यासाठी महापालिकेकडून पुढाकार घेण्यात आला आहे. कचऱ्याची उचल व्हावी यासाठी सफाई कामगारांना सातत्याने सूचना केल्या जात आहेत. तसेच नागरिकांनीही कचरा देताना ओला आणि सुका कचऱ्याचे वर्गीकरण करून द्यावे, असे सांगितले जात आहे. पण, अद्यापही  कचऱ्याचे वर्गीकरण न करताच मिश्रित कचरा देत आहेत. गेल्या महिन्याभरापासून सातत्याने वर्गीकरणासंदर्भात जागृती केली जात असली तरीही म्हणावा तसा प्रतिसाद मिळत नसल्याचे दिसून येत आहे. त्यामुळे महापालिकेकडून कचऱ्याचे वर्गीकरण करण्यासंदर्भात जागृती करणारे फ्लेक्स लावण्यात आलेले वाहन शहर-उपनगरात फिरविले जात आहे. त्या वाहनाच्या माध्यमातून कचरा वर्गीकरणाचे महत्त्व पटवून दिले जात आहे.