महापालिका आयुक्तांची शहापूर-खासबाग आठवडी बाजाराला भेट

बेळगाव : शहापूर येथील खासबाग येथे रविवारी बाजार भरला जातो. याठिकाणी ग्रामीण भागातील शेतकरी भाजीपाला, कडधान्य तसेच इतर माल विक्रीसाठी दाखल होतात. खरेदीदारही मोठी गर्दी करतात. मात्र, या व्यापाऱ्यांना कोणत्याही सोयीसुविधा उपलब्ध करण्यात आल्या नाहीत. याबाबत नगरसेवक रवी साळुंखे यांनी महापालिका आयुक्तांना या परिसराची पाहणी करण्याची विनंती करण्यात आली होती. त्या विनंतीनुसार रविवारी महापालिका आयुक्त अशोक दुडगुंटी यांनी भेट देऊन पाहणी केली. यावेळी नगरसेवक साळुंखे यांनी व्यावसायिकांना शौचालय तसेच स्वच्छतागृह नसल्याने समस्या निर्माण होत असल्याचे सांगितले. त्यावर दुडगुंटी यांनी लवकरच याठिकाणी सोय करण्याबबत पाऊल उचलले जाईल, असे आश्वासन दिले. गटारीमधील गाळ काढला जात नाही. त्यामुळे अनेक घरांमध्ये पाणी शिरते. तसेच रस्त्याच्या मधोमध बांधलेले गाळे कुचकामी ठरत आहेत. केवळ 120 गाळे आहेत. मात्र, दोन हजाराहून अधिक व्यावसायिक व शेतकरी विक्रीसाठी बाजारात येतात. त्या सर्वांना जागाच उपलब्ध होणार नाही. त्यामुळे गाळे कुचकामी ठरले आहेत. याबाबत योग्य निर्णय घेऊन गाळे हटविण्याची गरज असल्याचे सांगितले. दुडगुंटींनी बाजारपेठेत फेरफटका मारून समस्या जाणून घेतल्या.