महापालिकेचा अर्थसंकल्प आज

बेळगाव : महापालिकेचा अर्थसंकल्प मांडण्यासाठी सोमवार दि. 13 रोजी सभागृहाची बैठक आयोजित करण्यात आली आहे. सभागृहाची स्थापना झाल्यानंतर अर्थसंकल्पावर नगरसेवक चर्चा करणार असून नव्या सभागृहात कोणत्या घोषणा केल्या जाणार आहेत, महापालिकेचा अर्थसंकल्प शहरवासियांना काय देणार? याकडे सर्वांचे लक्ष लागले आहे. महापालिकेचा अर्थसंकल्प तयार करण्यासाठी नगरसेवकांची बैठक आयोजित करून सूचना घेण्याची औपचारिकता पूर्ण केली. मात्र सूचना घेण्यासाठी आयोजित केलेली बैठक अचानक बोलाविण्यात आली होती. नगरसेवकांना नोटीस देण्यात आली नसल्याने बैठकीवेळी नाराजी व्यक्त करण्यात आली. त्यामुळे सोमवार दि. 13 रोजी सकाळी 10.30 वा. आयोजित केलेल्या अर्थसंकल्प बैठकीची नोटीस 7 दिवस आधी पाठविण्यात आली आहे. तसेच सोमवारी सकाळी होणाऱ्या बैठकीत अर्थसंकल्प मांडला जाणार आहे. महसूल स्थायी समितीची बैठक आयोजित करून सूचना घेतल्या जातात. तसेच सामाजिक संघटनांनी केलेल्या सूचनांची दखल घेऊन अर्थसंकल्प तयार केला जातो. तसेच महसूल स्थायी समितीचे अध्यक्ष अर्थसंकल्प महापालिकेत मांडतात. मात्र स्थायी समितीची निवडणूक झाली नसल्याने अर्थसंकल्प कोण मांडणार, असा मुद्दा उपस्थित झाला आहे. आगामी वर्षाचा अर्थसंकल्प महापौर मांडणार असल्याची माहिती उपलब्ध झाली आहे. अर्थसंकल्प बैठक आयोजित करण्याच्यादृष्टीने महापालिकेने सर्व तयारी केली आहे. नव्या सभागृहाच्या अर्थसंकल्पात कोणत्या योजना दडल्या आहेत. तसेच सर्वसामान्य नागरिकांना कोणत्या योजनांची खैरात केली जाणार आहे. याकडे शहरवासियांचे लक्ष लागले आहे.