वृत्तसंस्था/ मुंबई, जयपूर
2023 च्या क्रिकेट हंगामातील सुरु झालेल्या सैय्यद मुस्ताक अली टी-20 चषक क्रिकेट स्पर्धेत झालेल्या सामन्यात अजिंक्य रहाणेच्या नाबाद अर्धशतकाच्या जोरावर मुंबईने हरियाणाचा 8 गड्यांनी पराभव केला. तर जयपूरमध्ये झालेल्या अन्य एका सामन्यात बडोदा संघाने जम्मू काश्मिरवर 19 धावांनी विजय नोंदविला.
मुंबई आणि हरियाणा यांच्यातील खेळविण्यात आलेल्या अ गटातील सामन्यात प्रथम फलंदाजी करताना हरियाणा संघाने 18 षटकात 5 बाद 147 धावा जमविल्या. हरियाणा संघातील हर्षल पटेलने 27 चेंडूत 4 चौकार आणि 2 षटकारांसह 38 धावा जमविल्या. हर्षल पटेल आणि अंकित कुमार यांनी 47 चेंडूत पहिल्या गड्यासाठी 67 धावांची भागीदारी केली. अंकित कुमारने 26 चेंडूत 6 चौकारांसह 36 धावा जमविल्या. मुंबईच्या तनुश कोटीयानने 19 धावात 3 गडी बाद केले. मात्र मुंबई संघातील वेगवान गोलंदाज तुषार देशपांडे प्रभावी ठरु शकला नाही. त्याने 4 षटकात 48 धावा दिल्या. प्रत्युत्तरादाखल खेळताना मुंबईने 15.5 षटकात 2 बाद 149 धावा जमवित शानदार विजय नोंदविला. मुंबई संघातील अनुभवी फलंदाज अजिंक्य रहाणेने 43 चेंडूत 3 षटकार आणि 6 चौकारांसह नाबाद 76 धावा झळकाविल्या. रहाणेला 57 धावावर जीवदान मिळाले होते.
संक्षिप्त धावफलक : हरियाणा 18 षटकात 5 बाद 147 (हर्षल पटेल 38, अंकित कुमार 36, कोटीयान 3-19, मोहित अवस्थी 2-15), मुंबई 15.5 षटकात 2 बाद 149 (अजिंक्य रहाणे नाबाद 76).
बडोदा विजयी
जयपूरमध्ये झालेल्या अ गटातील अन्य एका सामन्यात बडोदा संघाने जम्मू काश्मिरचा 19 धावांनी पराभव केला. या सामन्यात बडोदा संघातील वेगवान गोलंदाज अभिमन्यू सिंगने 26 धावात 4 गडी बाद केले. तर कर्णधार कृणाल पांड्याने 19 धावात 1 बळी मिळविला.
या सामन्यात प्रथम फलंदाजी करताना बडोदा संघातील फलंदाजांना जम्मू-काश्मिरच्या वेगवान गोलंदाजांनी फटकेबाजीपासून चांगलेच रोखले. जम्मू-काश्मिरच्या युद्धवीर सिंगने डावातील चौथ्या षटकात बडोद्याच्या हर्षल देसाईला 5 धावावर तर त्यानंतर विष्णू सोळुंखेला खाते उघडण्यापूर्वी बाद केले. 5 षटकाअखेर बडोदा संघाची स्थिती 3 बाद 26 अशी होती. कर्णधार कृणाल पांड्या आणि एस. शर्मा यांनी चौथ्या गड्यासाठी 111 धावांची महत्त्वपूर्ण भागीदारी केली. त्यामुळे बडोदा संघाला 18.3 षटकात 137 धावापर्यंत मजल मारता आली. कृणाल पांड्याने 48 चेंडूत 56 धावा जमविल्या. प्रत्युत्तरादाखल खेळताना जम्मू-काश्मिर संघाला 118 धावांपर्यंत मजल मारता आली. जम्मू-काश्मिर संघातील कमरान इक्बाल आणि शुभम खजोरीया यांनी 63 धावांची भागीदारी केली. इक्बालने 30 चेंडूत 37 तर खजोरीयाने 24 चेंडूत 29 धावा जमविल्या. बडोदा संघातील सोपारीयाने 10 धावात 1 तर मेरीवालाने 25 धावात 3 गडी बाद केले.
