पूर-पावसाने काही भागात हाहाकार ः कॅलिफोर्नियाला सर्वाधिक फटका, उद्योग व्यवसाय बंद ठेवल्याने कोटय़वधींचा फटका
कॅलिफोर्निया / वृत्तसंस्था
अमेरिकेला सध्या नैसर्गिक आपत्तींनी वेढले आहे. हिम चक्रीवादळानंतर आता पूर आणि पावसाने कहर केला आहे. आतापर्यंत 20 हून अधिक लोकांचा मृत्यू झाला आहे. पूर, पाऊस आणि वादळाचा हा परिणाम अमेरिकेतील कॅलिफोर्निया राज्यात सर्वाधिक पाहायला मिळत आहे. आतापर्यंत 70 हजारांहून अधिक लोकांना बाधित भागातून सुरक्षितस्थळी हलवण्यात आले आहे. परिस्थिती बिकट झाल्यामुळे राष्ट्राध्यक्ष जो बायडेन यांनी या भागात आपत्ती घोषित केली आहे.
अमेरिकेच्या बऱयाच भागात हिमवादळ, पूर आणि पावसामुळे लोकांना खूप त्रास सहन करावा लागत आहे. बरीच घरे पाण्याखाली गेली आहेत. अनेक ठिकाणी रस्तेही तुटल्यामुळे संपर्क यंत्रणा कोलमडली आहे. येत्या काही दिवसांत परिस्थिती आणखी गंभीर होणार असल्याचे हवामान तज्ञांचे म्हणणे आहे.
गेल्या 15 दिवसात कॅलिफोर्नियामध्ये कोसळलेल्या पावसामुळे राज्याचा 80 टक्के भाग पाण्याखाली गेला आहे. घरांमधील वीज, शुद्ध पाणी यांच्यासह संपर्क यंत्रणेवर परिणाम झाला आहे. अनेक ठिकाणी रस्ते आणि पूलही तुटले आहेत. लोकांना वाचवून सुरक्षितस्थळी नेण्यात येत आहे. आतापर्यंत 70 हजारांहून अधिक लोकांची सुटका करण्यात आली आहे. याशिवाय आणखी 75 हजार लोकांना सुरक्षित ठिकाणी पोहोचण्याचे आव्हान आपत्ती निवारण यंत्रणांसमोर असल्याचे कॅलिफोर्नियाचे गव्हर्नर गॅविन न्यूजम यांनी सांगितले.
रस्ते, पूल, महामार्ग पाण्याने उद्ध्वस्त
मुसळधार पावसामुळे कॅलिफोर्नियातील अनेक महामार्ग, रस्ते आणि पूल पाण्याने उद्ध्वस्त झाले आहेत. अनेक घरांचेही नुकसान झाले आहे. मुसळधार पाऊस, वादळ आणि पुरामुळे आतापर्यंत दोन लाख कोटी रुपयांपेक्षा जास्त नुकसान झाल्याची भीती व्यक्त करण्यात येत आहे. पूर-चक्रीवादळामुळे कॅलिफोर्नियातील व्यवसाय आणि उद्योगधंदेही बंद करण्यात आले आहेत. त्यामुळे लाखो कोटी रुपयांचे नुकसान होत आहे.
इतिहासातील सर्वात मोठय़ा वादळांपैकी एक
कॅलिफोर्नियाला धडकलेले आतापर्यंतचे सर्वात मोठे वादळ असे चक्रीवादळाचे वर्णन केले जात आहे. यापूर्वी 1861 मध्ये कॅलिफोर्नियामध्ये भीषण पूर आला होता. 43 दिवस चाललेल्या या पुरात एक हजाराहून अधिक लोकांचा मृत्यू झाला. आता कॅलिफोर्निया शहराने गेल्या एका महिन्यात आठ वादळे झेलली आहेत. या चक्रीवादळाच्या स्थितीमुळे मुसळधार पाऊस आणि पूर असा दुहेरी सामना करावा लागत आहे.
