अमननगर परिसरातील पायाभूत समस्येसह शैक्षणिक सुविधांमध्ये सुधारणेवर अधिक लक्ष – आम. असिफ सेठ

बेळगाव उत्तरचे आमदार आसिफ सेठ यांनी युवा नेते अमान सेठ यांच्या सोबत अमन नगर येथे जनता दरबार निमित्त भेट दिली. या भेटीदरम्यान आमदार सेठ यांनी स्थानिक रहिवाशांशी संवाद साधला, आणि त्यांच्या परिसरातील पायाभूत सुविधांपासून, सुरक्षा, स्वच्छता आणि सार्वजनिक सेवांबद्दलच्या समस्यां जाणून घेतल्या. सेठ यांचे या प्रसंगी अमन नगर परिसरातील रहिवाशांनी उत्स्फूर्तपणे स्वागत केले. या जनता दरबारमुळे या परिसरातील नागरिकांना आपल्या समस्या मांडण्याची संधी मिळाली. यावेळी अमन नगर येथील सरकारी उर्दू शाळेला आमदार असिफ सेठ तसेच युवा नेते अमान सेठ यांनी भेट देऊन विद्यार्थी आणि शिक्षकांशी संवाद साधला. सर्वांसाठी दर्जेदार शिक्षणाचे महत्त्व पटवून देत सेठ यांनी परिसरातील शैक्षणिक पायाभूत सुविधांमध्ये सुधारणा करण्याचे सूतोवाच केले. आमदार सेठ यांनी येथील रहिवाशांच्या समस्या या संबंधित अधिकाऱ्यांकडे मांडून आपल्या मतदार संघातील लोकांच्या कल्याणाला चालना देणाऱ्या उपक्रमांना पाठिंबा देत राहतील असे आश्वासन दिले.