पुणे / प्रतिनिधी :
पुणे शहरातील सहकानगर परिसरातील सराईत गुन्हेगार संदीप शेंडकर याच्यासह टोळीविरुद्ध पोलीस आयुक्त रितेश कुमार यांनी मोक्कानुसार कारवाई केली आहे. पोलिस आयुक्तांनी मोक्कानुसार केलेली ही 21 वी कारवाई आहे. त्यामुळे गुन्हेगारी टोळय़ांमध्ये दहशत निर्माण होण्यास मदत झाल्याची माहिती पोलिसांनी दिली.
संदीप सोमनाथ शेंडकर (वय 23, टोळी प्रमुख), ऋषी शिवाजी भगत (वय 29 ) सुफियान बशिर शेख (वय 19) अल्ताफ सलिम शेख, (वय 19, सर्व रा. बालाजीनगर, धनकवडी, पुणे ) अशी कारवाई केलेल्या आरोपीची नावे आहेत.
संबंधित टोळक्याने काही दिवसांपूर्वी एका तरुणास जीवे ठार मारण्याच्या उद्देशाने त्याच्यावर धारदार शस्त्राने वार केला होता. सहकारनगर परिसरातील स्थानिक नागरिक फिर्यादीच्या मदतीसाठी आले असता टोळक्याने त्यांनाही जीवे मारण्याची धमकी दिली. तसेच धारदार हत्यारे हवेत फिरवत दुचाकीवर बसून मोठमोठय़ाने आरडाओरडा करीत सदर परिसरात दहशत निर्माण केली. टोळीप्रमुख संदीप शेंडकर याने दहशत प्रस्थापित ठेवण्यासाठी स्वत:च्या टोळीचे वर्चस्व निर्माण करण्याचा प्रयत्न केला. त्याच्याविरुद्ध सहकारनगर, भारती विद्यापीठ, कोंढवा पोलीस ठाण्याच्या हद्दीत खुनाचा प्रयत्न, सदोष मनुष्य वधाचा प्रयत्न, गंभीर दुखापतीचे गुन्हे आत्तापर्यंत दाखल आहेत. वेळोवेळी सूचना देऊनही त्यांच्या वर्तणुकीत बदल होत नसल्याचे पोलिसांच्या निदर्शनास आले. त्यामुळे याप्रकरणी त्याच्याविरूद्ध मोक्कानुसार कारवाईचा प्रस्ताव सहकारनगर पोलिसांकडून पाठविण्यात आला होता. त्यानुसार पोलिस आयुक्त रितेश कुमार यांनी टोळीविरुद्ध मोक्का कारवाई केली आहे.
