14 रोजी मुख्य दिवस : विविध धार्मिक कार्यक्रमांचे आयोजन
वार्ताहर/दड्डी
कर्नाटक, महाराष्ट्र, गोवा व कोकण भागातील जनतेचे आराध्य दैवत श्री भावेश्वरी देवी मोहनगा येथील यात्रेला 13 फेब्रुवारीपासून प्रारंभ होणार आहे. ही यात्रा 13, 14 व 15 रोजी साजरी होणार आहे. 14 जी यात्रेचा मुख्य दिवस असून भाविकांनी आयोजित कार्यक्रमांचा लाभ घेण्याचे आवाहन यात्रा कमिटीच्यावतीने करण्यात आले आहे. 13 रोजी सायंकाळी 6 वाजता शस्त्र इंगळ्याचा कार्यक्रम, 14 रोजी यात्रेचा मुख्य दिवस असल्याने देवीला दंडवत व महानैवेद्याचा कार्यक्रम, 15 रोजी पालखी मिरवणूक काढल्यानंतर यात्रेची सांगता होणार आहे. मंदिर आवारात दुकाने थाटण्यासाठी जागेचा कर सलामवाडी ग्रामपंचायतीकडे भरावा लागणार आहे. दुकानदारांनी 1993 च्या ग्रामपंचायत कायद्याचे काटेकोर पालन करण्याची सूचना करण्यात आली आहे. दरवर्षीप्रमाणे परिवहन मंडळाच्यावतीने बेळगाव परिवहन महामंडळ महाराष्ट्रातील गडहिंग्लज आगारातून भाविकांसाठी विशेष बसची सोय करण्यात आली आहे.
ग्रामपंचायतवतीने पिण्याच्या पाण्याची सोय, वैद्यकीय सेवा सुरळीत करण्यात येणार आहे. यात्राकाळात कोणतीही कमतरता भासल्यास ग्रामपंचायतीच्यावतीने त्या समस्या सोडवल्या जातील. सलामवाडी ग्रामपंचायत परवानगी शिवाय कोणालाही दुकान किंवा स्टॉल लावता येणार नाही. ग्रामपंचायतीच्या वतीने दिलेल्या जागेपेक्षा जागा जास्त व्यापरल्यास जादा रक्कम आकारण्यात येईल. ग्रामपंचायत पावती काढल्याशिवाय कोणतेही दुकान लावण्यास परवानगी दिली जाणार नाही. घटप्रभा नदीकडील दुकानदारांना सुद्धा पावती काढावी लागेल. पावती घेतल्याशिवाय बकरी विक्रीला परवानगी नाही, असे ग्रामपंचायतीच्या वतीने कळविण्यात आले आहे. कोंबडी व बकरी बाजार मोदगे-सलामवाडी रस्त्याच्या बाजूला असलेल्या गायरानमध्ये भरवण्यात येईल्। याची भाविकांनी व व्यापाऱ्यांनी नोंद घ्यावी. घटप्रभा नदीला पाणी खूप असल्यामुळे भाविकांनी कृपया मोदगे बंधाऱ्यावरून वाहतूक करावी, असे आवाहन ग्रामपंचायती वतीने करण्यात आली आहे.
