बेळगाव प्रिमियर लिग टेनिसबॉल क्रिकेट स्पर्धा
अर्जुन स्पोर्ट्स क्लब आयोजित बेळगाव प्रिमियर लिग टेनिसबॉल क्रिकेट स्पर्धेत मंगळवारी खेळविण्यात आलेल्या सामन्यातून सरकार स्पोर्ट्स गांधीनगरने एवायएम अनगोळचा 8 गड्यांनी, साक्षी एंटरप्राइजेसने स्पोर्ट्स ऑन संघाचा 16 धावांनी, तनय स्पोर्टींग संघाने एसआरएस हिंदुस्थान संघाचा 23 धावांनी तर मोहन मोरे संघाने सिग्नेचर संघाचा 7 गड्यांनी पराभव करुन प्रत्येकी 2 गुण मिळविले. पुंडलिक पाटील, आकाश कटांबळे, अभिजित पाटील, रब्बानी दफेदार, यांना सामनावीर पुरस्कार देण्यात आला. प्लॅटिनम जुबली मैदानावर खेळविण्यात आलेल्या पहिल्या सामन्यात एवायएम अनगोळने प्रथम फलंदाजी करताना 8 षटकात 6 गडी बाद 43 धावा केल्या. त्यात आकाश असलकरने 2 चौकारांसह 11 तर आदित्य वारंगने 10 धावा केल्या. सरकार गांधीनगरतर्फे पुंडलिक पाटीलने 12 धावात 2 तर मारुती के. व मनिष घाटगे यांनी प्रत्येकी 1 गडी बाद केला. प्रत्युत्तरादाखल खेळताना सरकार स्पोर्ट्सने 3.3 षटकात 2 गडी बाद 47 धावा करुन सामना 8 गड्यांनी जिंकला. त्यात कर्णधार पार्थ पाटीलने 2 चौकारांसह नाबाद 14, नवीन अंचनमनी व गणेशने प्रत्येकी 1 चौकार, 1 षटकारासह 10 धावा केल्या. एवायएम अनगोळतर्फे आदित्य वारंग व आकाश असलकर यांनी प्रत्येकी 1 गडी बाद केला.
दुसऱ्या सामन्यात साक्षी एंटरप्राइजेसने प्रथम फलंदाजी करताना 7.3 षटकात सर्व गडी बाद 51 धावा केल्या. कर्णधार आकाश कटांबळेने 2 चौकारांसह 19 धावा, संतोष चव्हाणने 12 धावा केल्या. स्पोर्ट्स ऑनतर्फे संतोष सुळगे-पाटीलने 9 धावात 3, राजू मुजावरने 16 धावात 2 तर दीपक नार्वेकर व सुनील पाटील यांनी प्रत्येकी 1 गडी बाद केला. प्रत्युत्तरादाखल खेळताना स्पोर्ट्स ऑन संघाने 8 षटकात 6 गडी बाद 35 धावाच केल्या. त्यात संतोष सुळगे-पाटीलने 2 चौकारांसह 15 धावा केल्या. साक्षी एंटरप्राइजेसतर्फे सागर जे. ने 9 धावात 3, अमोल यल्लूपाचेने 7 धावात 2 तर आकाश कटांबळेने 1 गडी बाद केला.
तिसऱ्या सामन्यात तनय स्पोर्टींग संघाने प्रथम फलंदाजी करताना 8 षटकात 3 गडी बाद 63 धावा केल्या. त्यात कर्णधार अभी पाटीलने 1 चौकार, 1 षटकारासह 24, गजानन झडमाळेने 1 षटकार, 1 चौकारासह 18 तर अंझारने 2 चौकारांसह 12 धावा केल्या. एसआरएसतर्फे रोहित पाटील, विशाल शंभूचे, फयाज सिद्दकी यांनी प्रत्येकी 1 गडी बाद केला. प्रत्युत्तरादाखल खेळताना एसआरएस हिंदुस्थान संघाचा डाव 8 षटकात सर्व गडी बाद 40 धावात आटोपला. त्यांचा एकही फलंदाज दुहेरी धावसंख्या गाठू शकला नाही. तनय स्पोर्टींगतर्फे साकिबने 6 धावात 3 गडी बाद केले. चौथ्या सामन्यात सिग्नेचर इलेव्हन संघाने प्रथम फलंदाजी करताना 8 षटकात 3 गडी बाद 43 धावा केल्या. त्यात मनोज पाटीलने 2 चौकारांसह नाबाद 22, दऱ्याप्पाने 10 धावा केल्या. मोहन मोरेतर्फे कैयुम पिरजादेने 7 धावात 2 तर श्रेयस मातिव•रने 1 गडी बाद केला. प्रत्युत्तरादाखल खेळताना मोहन मोरे संघाने 5.4 षटकात 3 गडी बाद 44 धावा करुन सामना 7 गड्यांनी जिंकला. त्यात कर्णधार रब्बानी दफेदारने 1 षटकार, 3 चौकारांसह 26, नरेंद्र मांगोरेने 2 चौकारांसह 8 धावा केल्या. सिग्नेचरतर्फे मनोज ताशिलदारने 14 धावात 2 गडी बाद केले. सामन्यानंतर प्रमुख पाहुणे निलेश पाटील, प्रकाश पाटील, विशाल गौरगौंडा, मारुती शिंदे, अयुमखान पठाण, सद्दाम होस्कोटी, मनोज कुलकर्णी, बंडू एच. यांच्या हस्ते सामनावीर अभिजित पाटील, रब्बानी दफेदार, पुंडलिक पाटील, आकाश कटांबळे तर इम्पॅक्ट खेळाडू संतोष सुळगे-पाटील, श्रेयस, सागर जाधव, पार्थ पाटील यांना चषक देऊन गौरविण्यात आले.
