वार्ताहर / राजापूर
आमदार राजन साळवी यांची लाचलुचपत विभागाकडून चौकशी सुरू आहे. बुधवारी पुन्हा एकदा आमदार साळवी अलिबाग येथील लाचलुचपत कार्यालयात कागदपत्रे घेऊन हजर राहत चौकशीला समोर गेले.
ठाकरे गटाचे आमदार राजन साळवी यांच्या मालमत्तेबाबत रायगड लाचलुचपत विभागाने चौकशीची नोटीस डिसेंबर महिन्यात पाठवली होती. त्यानंतर आमदार साळवी हे लाचलुचपत कार्यालयात येऊन चौकशीला हजर झाले होते. त्यानंतर 20 जानेवारी रोजी मालमत्तेची कागदपत्र घेऊन हजर झाले होते. यावेळी त्यांच्याविषयी तसेच कुटुंबियांच्या मालमत्तेची चौकशी करण्यात आली होती. आमदार साळवी यांनी सादर केलेली कागदपत्रे याचे समाधान न झाल्याने इतर कागदपत्रे सादर करण्यास लाचलुचपत विभागाने सांगितले होते. त्यानुसार 10 फेब्रुवारीपर्यंत कागदपत्रे सादर करण्यास सांगण्यात आले. त्यानुसार बुधवारी दुपारी 12 वाजता आमदार साळवी यांने अलिबाग कार्यालयात हजर राहून कागदपत्रे सादर केली. त्यांनतर तरी विभागाचे समाधान होणार की आमदार साळवी याच्या अडचणी वाढणार, हे चौकशीनंतर समोर येणार आहे.
