कोल्हापूर :
विधानसभेची निवडणूक होऊन जेमतेम 15 दिवस झाले आहेत. अजून मंत्री मंडळाचा विस्तारही झालेला नाही. पण दुसऱ्या बाजूला आमदार अमल महाडिक अॅक्शन मोडवर आले आहेत. बुधवारी आमदार महाडिक यांनी महापालिकेत अधिकाऱ्यांची बैठक घेत शहरातील प्रलंबित कामासाठी प्रशासनाला 100 दिवसांचा अल्टिमेटम दिला. त्यानंतर अन्य एका बैठकीत विमान, रेल्वे, पर्यटनाशी निगडित विषयावरही संबधितांशी संवाद साधत भविष्यात कामाचा धडाका असेल याची चुणूक दाखविली.
शहरात अमृत योजनेअंतर्गत पाईपलाईन, ड्रेनेजची कामे अपूर्ण आहेत. अनेक रस्ते डांबरीकरणाच्या प्रतीक्षेत आहेत. अपुरा पाणीपुरवठा, ड्रेनेजलाईन अभावी शहरासह उपनगरात अनेक समस्या निर्माण होत आहेत. जागोजागी कचऱ्याचे साचलेले ढीग, भटक्या कुत्र्यांची वाढती संख्या आदी प्रलंबित प्रश्न सोडविण्यासाठी आमदार महाडिक यांनी प्रलंबित कामासाठी मनपा अधिकाऱ्यांना 100 दिवसांचा अल्टिमेटम दिला आहे. बुधवारी आमदार महाडिक यांनी अचानक महापालिका अधिकारी, कर्मचाऱ्यांची बैठक घेवून तत्काळ समस्या सोडविण्याच्या सुचना दिल्या.
यावेळी शहर अभियंता नेत्रदीप सरनोबत, जल अभियंता हर्षजीत घाटगे यांच्यासह महापालिकेचे अधिकारी आणि कर्मचाऱ्यांकडून कामाचा आढावा घेतला. अमृत योजनेला वेळोवेळी मुदतवाढ मिळूनही अजून कामे अर्धवट का राहिली? कचरा उठाव व मोकाट कुत्र्यांच्या निर्बिजीकरणासाठी कोणत्या उपाययोजना केल्या? याची माहिती संबंधित अधिकाऱ्यांकडून महाडिक यांनी घेतली. येत्या 100 दिवसात सर्व प्रलंबित कामे मार्गी लावावीत आणि जनतेची गैरसोय दूर करावी.
प्रत्येक महिन्याच्या 24 तारखेला प्रत्येक विभागाची स्वतंत्र बैठक घेऊन कामांचा आढावा घेतला जाईल. प्रत्यक्ष जागेवर जाऊन पाहणी करणार असल्याचे त्यांनी सांगितले. कामात त्रुटी आढळता कामा नयेत असा इशाराही महाडिक यांनी अधिकाऱ्यांना दिला. विविध उपाय योजना राबवण्यासाठी महापालिका प्रशासनाने आराखडा बनवावा, शासन स्तरावर निधीसाठी पाठपुरावा केला जाईल असे आश्वासनही आमदार महाडिक यांनी दिले.
