वृत्तसंस्था/ फोर्ड, नॉर्वे
भारताची स्टार महिला वेटलिफ्टर मीराबाई चानूने येथे सुरू असलेल्या वर्ल्ड वेटलिफ्टिंग चॅम्पियनशिपमध्ये महिलांच्या 48 किलो वजन गटात रौप्यपदक पटकावले. याआधीही तिने या स्पर्धेत दोन पदके पटकावली आहेत.
2017 मधील वर्ल्ड चॅम्पियन व 2022 मधील रौप्य मिळविणाऱ्या चानूनेन एकूण 199 किलो (स्नॅचमध्ये 84 किलो व क्लीन आणि जर्कमध्ये 115 किलो) वजन उचलत पदक जिंकणाऱ्या खेळाडूंत स्थान मिळविले. स्नॅचमध्ये तिला थोडा संघर्ष करावा लागला. 87 किलो वजन उचलताना तिला दोनदा अपयश आले. पण क्लीन आणि जर्कमध्ये तिला लय सापडली आणि तीनही प्रयत्न तिचे यशस्वी ठरले. तिने 109, 112, 115 किलो वजन सहजपणे उचलले. यापूर्वी 2021 मध्ये तिने टोकियो ऑलिम्पिकमध्ये 115 किलो वजन उचलत रौप्य मिळविले होते.
या क्रीडाप्रकारात उत्तर कोरियाच्या रि साँग गमने 213 (91+122) किलो वजन उचलत सुवर्ण मिळविताना एकूण व क्लीन-जर्कमध्ये नवा विश्वविक्रम नोंदवला. थायलंडच्या थानयाथॉन सुकचॅरोनने कांस्यपदक मिळविताना एकूण 198 किलो वजन उचलले.
