गौण खनिज रॉयल्टी भरणा आता ऑनलाईन पद्धतीने

पणजी : राज्यात बांधकामांसाठी वापरण्यात येणाऱ्या गौण खनिजावर राज्यातील विविध सरकारी खाती, सार्वजनिक क्षेत्रातील उपक्रम, स्वायत्त संस्था, मनपा/नगरपालिका, जिल्हा पंचायती आणि ग्रामपंचायती यांच्याद्वारे आकारण्यात आलेली रॉयल्टी जमा करण्यासाठी खाण आणि भूगर्भ संचालनालयाने ऑनलाईन पेमेंट प्रणाली चालू केली आहे. काल 1 ऑगस्टपासून तिची कार्यवाही प्रारंभही झाली आहे. आतापर्यंत वरील सर्व संस्थांकडून रॉयल्टीचा भरणा व्यक्तीगतरित्या करण्यात येत होता. तथापि दि. 1 ऑगस्टपासून गौण खनिजांवर आकारलेली रॉयल्टी केवळ ऑनलाईन मोडमध्ये जमा करावी लागणार आहे. सार्वजनिक बांधकामात वापरल्या जाणाऱ्या गौण खनिजांवर आकारलेली रॉयल्टी जमा करण्याची ही प्रणाली केवळ राज्य आणि केंद्र सरकार या दोन्ही सरकारी संस्थांसाठी आहे. ही प्रणाली कोणत्याही खाजगी संस्थेला लागू नसल्याचे अधिसूचनेत स्पष्ट करण्यात आले आहे. नोंदणीसंबंधी संस्थेचे नाव निवडण्यासाठी व प्रथमच लॉगिन क्रेडेन्शियल्स मिळविण्यासाठी खाण खात्याच्या वेबसाइटवर ऑनलाइन प्रणालीमध्ये ड्रॉपडाऊन मेनू उपलब्ध करण्यात आला आहे. एखादी संस्था या मेनूमध्ये प्रतिबिंबित होत नसेल तर सदर संस्था जोडण्याची विनंती करणारा ईमेल संबंधितांकडून या खात्याला पाठवावा लागेल. यासंबंधी अधिक माहितीसाठी (8882254254 विस्तार 33) या क्रमांकावर नियंत्रण कक्षाशी संपर्क करावा, असे कळविण्यात आले आहे.