सातारा :
मराठ्यांची चौथी राजधानी साताऱ्यात तब्बल 32 वर्षानंतर अखिल भारतीय मराठी साहित्य संमेलन होत आहे. राजधानी साताऱ्यात होणाऱ्या 99 व्या साहित्य संमेलनाच्या स्वागताध्यक्षपदी सार्वजनिक बांधकाम मंत्री श्री. छ. शिवेंद्रसिंहराजे यांची एकमताने निवड करण्यात आली आहे, अशी माहिती अखिल भारतीय मराठी साहित्य महामंडळाचे कोषाध्यक्ष विनोद कुलकणी यांनी पत्रकार परिषदेत दिली.
साताऱ्यात मसाप शाहुपूरी शाखा, मावळा फौंडेशन या संस्थांनी मागणी केल्यानुसार साताऱ्यात हे 99 वे अखिल भारतीय मराठी साहित्य संमेलन होत आहे. या दोन्ही संस्थांची संयुक्त बैठक नुकतीच झाली. या बैठकीच्या अध्यक्षस्थानी अखिल भारतीय मराठी साहित्य महामंडळाचे कोषाध्यक्ष विनोद कुलकर्णी हे होते. यावेळी ज्येष्ठ साहित्यिक, विचारवंत किशोर बेडकिहाळ यांनी मंत्री श्री. छ. शिवेंद्रराजे यांचे नाव सुचवले. त्यास साहित्यिक डॉ. राजेंद्र माने, डॉ. उमेश करंबेळकर यांनी अनुमोदन दिले. यावेळी उपस्थित असलेल्या दोन्ही संस्थांच्या सर्व कार्यकारिणी सदस्यांनी मंत्री श्री. छ. शिवेंद्रराजे यांची एकमताने 99 व्या अखिल भारतीय साहित्य संमेलनाच्या स्वागताध्यक्षपदी निवड केली. या बैठकीस मसाप शाहुपूरी शाखेचे अध्यक्ष नंदकुमार सावंत, कार्याध्यक्ष अॅड. चंद्रकांत बेबले, उपाध्यक्ष विक्रम पाटील, प्रमुख कार्यवाह अजित साळुंखे, कार्यवाह संजय माने, कोषाध्यक्ष सचिन सावंत, सदस्य वजिर नदाफ, आर. डी. पाटील, अमर बेंद्रे, ज्योती कुलकर्णी, सौ. अश्विनी जठार, अनिल जठार, तुषार महामुलकर आदी उपस्थित होते.
श्री. छ. शिवेंद्रराजे यांनी मसाप शाहुपूरी शाखेच्या स्थापनेपासून तसेच शहर, जिह्यातील साहित्य चळवळीला नेहमीच सक्रीय पाठींबा दिला आहे. मराठी भाषेला अभिजात दर्जा मिळावा म्हणून पंतप्रधान नरेंद्र मोदी यांना 1 लाख पत्रे लिहण्याच्या मोहिमेचा शुभारंभही श्री. छ. शिवेंद्रराजे यांच्या हस्ते झाला होता. मराठीला अभिजात भाषेचा दर्जा मिळावा यासाठी दिल्लीत जावून आंदोलन करणारे ते एकमेव लोकप्रतिनिधी आहेत. मुख्यमंत्री देवेंद्र फडणवीस यांच्या माध्यमातून अनेकवेळा त्यांनी पंतप्रधान नरेंद्र मोदी यांच्याकडेही पाठपुरावा केला. मसाप शाहुपूरी शाखेने आयोजित केलेल्या विभागीय साहित्य संमेलन, युवा साहित्य नाट्या संमेलन यशस्स्वी करण्यासाठी त्यांनी मोलाची भूमिका बजावली. साताऱ्यात अखिल भारतीय मराठी साहित्य संमेलन व्हावे यासाठी त्यांनी सलग 12 वर्ष मसाप शाहुपूरी शाखेच्या प्रस्तावाला पाठींब्याचे पत्र देवूनही त्याचा पाठपुरावा केला होता. त्यांच्या या सर्व कार्याची मराठी भाषेविषयी असलेली प्रेमाची दखल घेवून त्यांची 99 व्या संमेनाच्या स्वागताध्यक्षपदी निवड करण्यात आल्याची माहिती कुलकर्णी यांनी यावेळी दिली. तसेच या निर्णयाची माहिती महामंडळाचे अध्यक्ष प्रा. मिलिंद जोशी, उपाध्यक्ष गुरैय्या स्वामी, कार्यवाह सुनीताराजे पवार यांना देण्यात आली आहे. त्यांनीही या निवडीबद्दल मंत्री श्री. छ. शिवेंद्रराजे यांचे अभिनंदन केले आहे.
- दुग्धशर्करा योग
साताऱ्यात यापूर्वी 66 वे अखिल भारतीय साहित्य संमेलन 1993 साली झाले होते. या संमेलनाच्या स्वागताध्यक्ष म्हणून दिवंगत श्री. छ. अभयसिंहराजे भोसले यांनी काम पाहिले होते. स्व. अभयसिंहराजेंनंतर त्यांच्या मुलाला श्री. छ. शिवेंद्रराजे यांना स्वागताध्यक्षपदी काम करण्याची संधी मिळाली आहे. साहित्य संमेलनाच्या 99 व्या वर्षाच्या इतिहासात वडील आणि मुलगा दोघेही स्वागताध्यक्ष होण्याची ही दुर्मिळ घटना आहे. साहित्य क्षेत्रातील हा दुग्धशर्करा योग पुन्हा सहज जुळून येईल असे वाटत नाही, त्यामुळे सातारा जिह्यात प्रचंड आनंदाचे वातावरण आहे.
- फार मोठा बहुमान दिला आहे
मसाप शाहुपूरी शाखा, मावळा फौंडेशन या दोन्ही संस्थांनी मला माझ्या वडिलानंतर साहित्य संमेलनाच्या स्वागताध्यक्षपदाचा फार मोठा बहुमान दिला आहे. या दोन्ही संस्था विनोद कुलकर्णी आणि त्यांच्या सर्व सहकाऱ्यांचे मी आभार मानतो. शताब्दीपूर्व साहित्य संमेलन राजधानी सातारा येथे सर्व जिल्हावासियांच्या सहकार्याने अतिशय देखणे आणि दिमाखदार करुन दाखवू, अभिजात मराठी भाषेच्या उत्सवासाठी देश, परदेशातील सर्व मराठी बांधवांना साताऱ्यात येण्याचे मी निमंत्रण देतो. आम्ही जोरदारपणे सर्वाचे स्वागत करु.
मंत्री श्री. छ. शिवेंद्रराजे भोसले,स्वागताध्यक्ष 99 वे अखिल भारतीय मराठी साहित्य संमेलन
