मंत्री सतीश जारकीहोळी यांनी खरेदी केले आणखी एक हेलिकॉप्टर

बेळगाव : सार्वजनिक बांधकाममंत्री तथा पालकमंत्री सतीश जारकीहोळी यांनी नूतन हेलिकॉप्टर खरेदी केले आहे. बेंगळूरनजीकच्या जक्कूर विमानतळावर मंत्री जारकीहोळी यांनी नूतन हेलिकॉप्टरची पाहणी केली. नूतन हेलिकॉप्टर लवकरच सेवेला उपलब्ध होईल, अशी माहिती मंत्री जारकीहोळी यांनी आपल्या फेसबुक अकाऊन्टवर शेअर केली आहे. त्यांनी यापूर्वी एक हेलिकॉप्टर खरेदी केले आहे. स्वत:चे हेलिकॉप्टर असणारे उत्तर कर्नाटकातील ते एकमेव राजकीय नेते ठरले आहेत. नूतन हेलिकॉप्टरमध्ये अत्याधुनिक डबल इंजिन असून पाच प्रवासी व दोन पायलट अशा सात जणांना घेऊन जाण्याची क्षमता आहे. यामध्ये सुधारित वायरलेस संदेश व्यवस्था असून अपघातप्रसंगी प्रवाशांना सुरक्षा देण्याची व्यवस्था नूतन हेलिकॉप्टरमध्ये आहे.