6800 जणांना कमी करणार असल्याची माहिती
वृत्तसस्था/ नवी दिल्ली
टेक कंपनी मायक्रोसॉफ्ट 6,800 कर्मचाऱ्यांना कामावरून काढून टाकणार आहे. ही कंपनीच्या एकूण कर्मचाऱ्यांपैकी सुमारे 3 टक्के इतकी कपात असणार आहे. सध्या कंपनीकडे सुमारे 2.28 लाख कर्मचारी आहेत. 2023 नंतर मायक्रोसॉफ्टमध्ये ही सर्वात मोठी कामावरून कर्मचाऱ्यांना कपात करण्याची मोहिम आहे. 2023 मध्ये कंपनीने सुमारे 10 हजार कर्मचाऱ्यांना कामावरून काढून टाकले होते. मीडिया रिपोर्ट्सनुसार, ही कामावरून काढून टाकण्याची प्रक्रिया कामगिरीवर आधारित नाही. मायक्रोसॉफ्टच्या प्रवक्त्याने सांगितले की, कंपनीला चांगल्या स्थितीत आणण्यासाठी आवश्यक असलेले बदल आम्ही सतत अंमलात आणत आहोत.
गेल्या 1 वर्षात मायक्रोसॉफ्टच्या समभागांमध्ये 32.58 डॉलर्स (7.82टक्के) वाढ झाली आहे. 14 मे 2024 रोजी कंपनीचा हिस्सा 416.56 होता, जो आता 449.14 डॉलर वर पोहोचला आहे. त्याच वेळी, या वर्षी त्यात 7.30 टक्के वाढ झाली आहे.
मेटानेही 3600 कर्मचाऱ्यांना काढले
सोशल मीडिया प्लॅटफॉर्म फेसबुक आणि व्हॉट्सअॅपची मूळ कंपनी मेटाने या वर्षी जानेवारीमध्ये 3600 कर्मचाऱ्यांना कामावरून काढून टाकले. मेटाने कामगिरीवर आधारित नोकरी कपात धोरणांतर्गत हा निर्णय घेतला. कंपनीच्या सुमारे 5 टक्के कर्मचाऱ्यांवर याचा परिणाम झाला.
मायक्रोसॉफ्ट भारतात 25,722 कोटी रुपये गुंतवणार
जानेवारीमध्ये मायक्रोसॉफ्टचे मुख्य कार्यकारी अधिकारी (सीईओ) सत्या नडेला यांनी पुढील 2 वर्षांत भारतातील त्यांच्या क्लाउड आणि आर्टिफिशियल इंटेलिजेंस (एआय) व्यवसायात 3 अब्ज डॉलर्स म्हणजेच 25,722 कोटी रुपयांची गुंतवणूक करण्याची घोषणा केली होती. सत्या नडेला यांनी मायक्रोसॉफ्ट एआय टूरच्या बेंगळूरू दौऱ्यात ही घोषणा केली.
