म्हादईप्रश्नी आज सुनावणी

पणजी : म्हादईप्रश्नी गोवा सरकारतर्फे सादर करण्यात आलेल्या खास याचिकेवर आज सोमवार 10 जुलै रोजी सर्वोच्च न्यायालयात सुनावणी होण्याची शक्यता आहे. न्यायालयाच्या यादीत सोमवारसाठी सदर याचिका समाविष्ट करण्यात आली आहे. न्या. संजीव खन्ना व न्या. एम. एम. सुंद्रेश यांच्या खंडपीठासमोर ही याचिका सुनावणीस येणार आहे. म्हादईचा विषय सध्या तरी थंड पडला असून न्यायालय काय निर्देश देते याकडे लक्ष लागून राहिले आहे. म्हादईचे पाणी वळवण्यापासून रोखण्यासाठी कर्नाटकला आदेश देण्यात यावेत अशी याचना गोवा सरकारने याचिकेतून केली आहे. कळसा-भांडुरा नाल्यातून म्हादईचे पाणी कर्नाटकच्या दिशेने मलप्रभा नदीत वळवण्याचे काम चालू असून त्यासाठी कसलेही परवाने घेण्यात आलेले नाहीत. वन्यजीवन संवर्धन कायदा – 1972 अंतर्गत मान्यता घेण्यात आलेली नाही, याकडे देखील याचिकेतून लक्ष वेधण्यात आले आहे. कर्नाटक सरकरने मात्र म्हादईचे पाणी वळवण्यासाठी कळसा भांडुरा प्रकल्पास (डिपीआर) मान्यता घेतली असून केंद्राकडून त्याकरीता रु. 1000 कोटींची तरतूद अर्थसंकल्पातून केली आहे. म्हादईचे पाणी वळवण्यासाठी कर्नाटकाकडून जोरात तयारी चालू असून केंद्राचे विविध परवान घेण्याची कामे चालू आहेत. गोव्यात मात्र म्हादई प्रकरणी उदासीनता दिसत असून, गोवा सरकार फक्त न्यायालयीन लढाईवर अवलंबून असल्याचे दिसून येत आहे.