भाषिक अल्पसंख्याक आयुक्तांची घेणार भेट
बेळगाव : महाराष्ट्र एकीकरण युवा समितीतर्फे दि. 26 रोजी मराठी भाषा गौरव दिनाच्या पूर्वसंध्येला ‘मराठी भाषा गौरव दिन सोहळा’ आयोजित करण्यात आला आहे. दुपारी 3 वा. खानापूर रोड, रेल्वे ओव्हरब्रिज जवळील मराठा मंदिर येथे कार्यक्रम होणार आहे. नुकत्याच संपन्न झालेल्या भव्य सामान्यज्ञान स्पर्धेचा बक्षीस वितरण सोहळा, कै. श्रीनिवास केशवराव म्हापसेकर स्मरणार्थ ‘युवा समिती आदर्श शाळा पुरस्कार वितरण सोहळा’ व गुणवंत विद्यार्थ्यांचा सन्मान सोहळा होणार असल्याची माहिती शनिवारी झालेल्या बैठकीत देण्यात आली. म. ए. युवा समितीची बैठक शनिवारी टिळकवाडी येथील कार्यालयात झाली.
बैठकीच्या अध्यक्षस्थानी युवा समितीचे अध्यक्ष अंकुश केसरकर होते. पुरस्कार वितरण सोहळ्याला जीएसटी विभागाचे अप्पर आयुक्त आकाश चौगुले उपस्थित राहणार असून ते युवावर्गाला मार्गदर्शन करणार आहेत. केंद्रीय भाषिक अल्पसंख्याक आयोगाचे आयुक्त 18 व 19 रोजी बेळगावला येणार आहेत. त्यांची भेट घेऊन सीमाभागातील कन्नड सक्ती निदर्शनास आणून देणे व सीमाभागातील मराठी भाषिकांना त्यांच्या भाषेत व्यवहार करता यावा, यासाठी निवेदन देण्याचा निर्णय घेण्यात आला. या बैठकीला उपाध्यक्ष वासू सामजी, राजू कदम, खजिनदार विनायक कावळे, आनंद धामणेकर, संतोष कृष्णाचे, विशाल गौंडाडकर, महेश जाधव, अश्वजीत चौधरी यांच्यासह मोठ्या संख्येने कार्यकर्ते उपस्थित होते. सरचिटणीस श्रीकांत कदम यांनी आभार मानले.
