पुणे / वार्ताहर :
पुण्याच्या लोहगाव परिसरात मॅफेड्रॉन, हेरॉईन विक्रीसाठी आलेल्या एकाला गुन्हे शाखेच्या अमली पदार्थ विरोधी पथकाने अटक केली. आरोपीकडून 58 लाख 57 हजारांचा मुद्देमाल जप्त करण्यात आला आहे.
गोपीचंद रामलाल बिश्नोई (वय 28, रा. चर्होली, मूळ, रा. जालोर, राजस्थान) असे अटक करण्यात आलेल्याचे नाव आहे. अमली पदार्थ विरोधी पथक दोनचे अधिकारी पथकास शहर परिसरात पेट्रोलिंग करीत होते. या दरम्यान लोहगावमधील काळेनगर भागात एक व्यक्ती मॅफेड्रॉन (एम.डी.) व हेरॉईन विक्री करण्यासाठी येणार असल्याची माहिती पोलीस अंमलदार योगेश मांढरे यांना मिळाली. त्यानुसार पथकाने सापळा रचून बिश्नोईला ताब्यात घेतले. त्याची झडती घेतली असता त्याच्याकडे 10 लाख 77 हजार 200 रुपये किंमतीचे 53 ग्रॅम एम.डी तसेच 46 लाख 89 हजार रुपये किमतीचे 312 ग्रॅम हेरॉईन आढळून आले. त्याच्याकडून अमली पदार्थासह दुचाकी जप्त करण्यात आली आहे. त्याच्याविरुद्ध विमानतळ पोलीस ठाण्यात गुन्हा दाखल करण्यात आला आहे. गुन्हे शाखेचे अप्पर पोलीस आयुक्त रामनाथ पोकळे, पोलीस उपायुक्त अमोल झेंडे, सहायक पोलीस आयुक्त सतीश गोवेक्र, अमली पदार्थ विरोधी पथक दोनचे वरिष्ठ निरीक्षक सुनील थोपटे यांच्यासह पथकाने ही कारवाई केली.
