वृत्तसंस्था/ नवी दिल्ली
पहलगाम हल्ल्यावर निर्णायक कारवाईसाठी भारत तयारी करत असतानाच बुधवारीही वरिष्ठ पातळीवर बैठकांची मालिका सुरू राहिली. पंतप्रधान नरेंद्र मोदी यांनी बुधवारी सकाळपासून सतत उच्चस्तरीय बैठका घेतल्या. हे प्रकरण केवळ पहलगाममधील दहशतवादी हल्ल्याचा बदला घेण्यापुरते मर्यादित नसल्यामुळे राजनयिक पातळीवरही याकडे गंभीरपणे पाहिले जात आहे. एकीकडे, देश 26 निष्पाप लोकांवरील हल्लेखोरांना आणि त्यांच्या सूत्रधारांना शिक्षा देण्याची योजना आखत आहे, तर दुसरीकडे, राजनैतिक पातळीवर जगभरातून भारताला वाढता पाठिंबा मिळत आहे. भारताला कोणतेही पाऊल पूर्णपणे निर्दोष रणनीतीवर उचलायचे आहे. त्यामुळे पूर्ण विचारमंथन करूनच पाकिस्तानला अद्दल घडविण्याची तयारी सुरू आहे.
बैठकांमध्ये निर्दोष योजनेवर विचारमंथन
सीसीएस बैठकीनंतर राजकीय व्यवहारांवरील मंत्रिमंडळ समितीची (सीसीपीए) बैठक झाली. पहलगाम हल्ल्यानंतर काँग्रेसने संसदेचे विशेष अधिवेशन बोलावण्याची मागणी केली असल्याने ही बैठक महत्त्वाची आहे. केंद्रीय मंत्री अर्जुन राम मेघवाल यांनीही अशी मागणी काँग्रेसकडून आली असून त्यावर सीसीपीएमध्ये चर्चा केली जाईल असे म्हटले आहे. राजकीय बाबींवरील ही सरकारची सर्वात मोठी समिती आहे. त्यात देशाच्या सध्याच्या राजकीय परिस्थितीवर चर्चा होण्याची शक्यता आहे. तिसरी महत्त्वाची बैठक आर्थिक व्यवहारांवरील कॅबिनेट समितीने आयोजित केली होती. ही भारत सरकारची आर्थिक बाबींवरील सर्वोच्च समिती आहे. देशाच्या सद्यस्थिती आणि त्याच्या आर्थिक पैलूंवर चर्चा करण्यासाठी ही बैठक बोलावण्यात आल्याचे मानले जाते.
