म्हारवासडा-उसगांव येथे मांसवाहू कंटेनर कलंडला

फोंडा : बेळगावहून चोलामार्गे गोव्यात दाखल झालेला मांसवाहू कंटेनर अचानक टायर फुटल्याने म्हारवासडा उसगांव येथील गोवा मांस प्रकल्पासमोरच कलंडला. सुदैवाने  चालक सुखरूप बचावला. तसेच याचवेळी समोरून येणाऱ्या दुचाकीवाहनाने प्रसंगवधान राखून वाहन अन्य मार्गाने वळवल्याने तोही सुखरूप बचावला. सदर घटनेत दोन्ही वाहनांचे नुकसान झाले. काल शुक्रवार सकाळी 7 वा. सुमारास हा अपघात घडला. फोंडा पोलिसांनी दिलेल्या माहितीनुसार बेळगावहून मांसवाहू कंटेनर टेम्पो केए 22 बी 5496 मांस घेऊन मडगांव येथे जात असताना मागच्या डाव्या बाजूचा टायर म्हारवासडा उसगांव येथील गोवा मांस प्रकल्पजवळ फुटल्याने रस्त्यावर कलंडला. त्याचवेळी दुचाकीचालकाने प्रसंगवधान राखून आपले वाहन रसत्याच्या अन्य मार्गाने वळवल्याने तो बचावला. फोंडा पोलिसांनी घटनास्थळी पंचनामा केला. वाहन परवाना, मांसवाहूप्रकरणी कागदपत्राची पडताळणी केली. बेळगाव येथील श्रृष्टी अग्रो अॅन्ड कॉल्ड स्टोरेज या आस्थपनातील मांस घेऊन टेम्पो मडगावच्या येथील मांस विक्रेत्यांना डिलीव्हरी देण्यासाठी जात असल्याची माहिती पोलिसांनी दिली.