सेन्सेक्सची 600 अंकांची उसळी : निफ्टीही तेजीसह बंद
मुंबई :
भारतीय भांडवली बाजारात चालू आठवड्यातील दुसऱ्या दिवशी मंगळवारच्या सत्रात विविध क्षेत्रांपैकी आयटी, एफएमसीजी, धातू या क्षेत्रातील समभागांच्या विक्रीमुळे सेन्सेक्स व निफ्टी यांचे निर्देशांक मजबूत स्थिती प्राप्त करुन बंद झाले आहेत. मागील काही दिवसांपासून बाजारात दबावाची स्थिती होती, परंतु मंगळवारी मजबूत स्थिती नोंदवल्याने आगामी काळातही यांचा फायदा होणार असल्याचे अभ्यासकांकडून सांगितले जात आहे.
दिग्गज कंपन्यांच्या मदतीने बीएसई सेन्सेक्स 600.42 अंकांच्या मजबुतीसह निर्देशांक 61,032.26 वर बंद झाला आहे. दुसऱ्या बाजुला राष्ट्रीय शेअर बाजाराचा निफ्टी हा दिवसअखेर 158.95 अंकांच्या कामगिरीसोबत निर्देशांक 17,929.85 वर बंद झाला आहे.
बाजारात मंगळवारी ऊर्जा व रियल इस्टेट हे क्षेत्र एक टक्क्यांनी घसरणीसह बंद झाले आहेत. याच्या विरुद्ध बाजूला मात्र आयटी, एफएमसीजी, धातू यांचे निर्देशांक मात्र तेजीसह बंद झाल्याची नोंद करण्यात आली आहे.
प्रमुख कंपन्यांमध्ये आयटीसीचे समभाग 3.31 टक्क्यांच्या तेजीसह बंद झाले असून अन्य कंपन्यांमध्ये रिलायन्स इंडस्ट्रीज, बजाज फायनान्स, आयसीआयसीआय बँक, इन्फोसिस, अॅक्सिस बँक, विप्रो, एचसीएल टेक, टेक महिंद्रा, महिंद्रा अॅण्ड महिंद्रा, भारती एअरटेल, बजाज फिनसर्व्ह, एचडीएफसी बँक, स्टेट बँक, एचडीएफसी, टीसीएस व टाटा स्टील यांचे समभाग तेजीसोबत बंद झाले आहेत.
सेन्सेक्समध्ये एनटीपीसीचे समभाग सर्वाधिक 1.10 टक्क्यांनी नुकसानीत राहिले. यासह अल्ट्राटेक सिमेंट, लार्सन अॅण्ड टुब्रो, सनफार्मा व एशियन पेन्ट्स यांचे समभाग घसरणीसोबत बंद झाले आहेत. यावेळी अमेरिकन डॉलरच्या तुलनेत रुपया आंशिक स्वरुपात नकारात्मकतेसोबत 82.76 वर बंद झाला आहे. जगभरातील अन्य बाजारातील तेजीमधील स्थितीमुळे देशातील बाजारात मंगळवारी मजबूत स्थिती राहिली होती. भारतामधील किरकोळ महागाई दराचे आकडे रिझर्व्ह बँकेकडून सादर करण्यात आल्याचा प्रभावही भारतीय बाजारावर राहिल्याचे अभ्यासकांनी सांगितले आहे
