उद्घाटनासप्रसंगी आर. एन. पाटील यांची प्रमुख उपस्थिती
वार्ताहर/येळ्ळूर
मराठी विद्यानिकेतन शाळेचा वार्षिक क्रीडा महोत्सव शुक्रवार दि. 13 व शनिवार दि. 14 डिसेंबर या दोन दिवसात उत्साहात पार पाडला. क्रीडा महोत्सव उद्घाटनासप्रसंगी प्रमुख पाहुणे म्हणून केदनूर माध्यमिक शाळेचे क्रीडा शिक्षक आर. एन. पाटील उपस्थित होते. सर्वप्रथम पाहुण्यांचे क्रीडांगणामध्ये आगमन झाल्यानंतर पाहुण्यांचे स्वागत गजानन सावंत, निला आपटे व उडकेकर यांच्या हस्ते करण्यात आले. पाहुण्यांच्या हस्ते ध्वजारोहण करण्यात आले. शाळेच्या क्रांती, ज्योती, प्रगती आणि भारती गटाने पाहुण्यांना मानवंदना दिली. क्रीडाज्योत राष्ट्रीय व राज्यस्तरीय खेळाडूंच्या हस्ते क्रीडांगणाभोवती फिरविण्यात आली. ऐश्वर्या कंग्राळकर हिने खेळाडूंना खिलाडूवृत्तीची शपथ दिली. त्यानंतर प्रमुख पाहुणे आर. एन. पाटील यांनी मुलांना खेळाविषयी उत्तम मार्गदर्शन केले व स्वत:चे अनुभव सांगितले. त्याचबरोबर वार्षिक स्पर्धांसाठी शुभेच्छा दिल्या. सूत्रसंचालन प्रतिभा मसूरकर यांनी केले व आभार पूजा संताजी यांनी मानले.
