राजापूर :
घर कामाकरीता ठेवलेल्या मोलकरणीने मालकाच्या घरातील दागिने व पैसे घेवून पोबारा केल्याची घटना राजापूर तालुक्यातील सोलगाव येथे घडली आहे. या प्रकरणी चंद्रकांत सखाराम शेलार यांनी राजापूर पोलीस स्थानकात फिर्याद दाखल केली असून पोलिसांनी वैष्णवी नलावडे राह. लोटे ता. खेड हिच्या विरोधात गुन्हा दाखल केला आहे. या घटनेत दागिने व रोख रक्कम असा सुमारे 14 हजार 750 रूपयांचा मुद्देमाल चोरीला गेला आहे.
शेलार हे आपल्या पत्नीसह सोलगाव, भटवाडी येथे वास्तव्याला आहेत. सेवानिवृत्त असलेल्या शेलार यांच्या पत्नीला हायशुगरचा त्रास असल्याने त्यांनी घरकामाकरीता मोलकरीण ठेवली होती. संबंधित मोलकरीण या वृध्द पती–पत्नीसह घरातच राहत होती. शनिवारी दुपारी जेवल्यानंतर शेलार व त्यांची पत्नी झोपलेली असताना दु.1.30 वाजण्याच्या सुमारास घरकाम करणाऱ्या वैष्णवी नलावडे ही टॉयलेटला जावून येते असे सांगून मागच्या दरवाजाने निघून गेली.
- मोलकरणी झाली गायब
जवळपास एक तास झाला तरी मोलकरीण परत न आल्याने शेलार यांच्या पत्नीने टॉयलेटमध्ये जावून पाहिले असता ती त्याठिकाणी आढळली नाही. तसेच घरात ठेवलेले तीचे साहित्य देखील नव्हते. शेलार पती–पत्नीने दुसऱ्या दिवशी सकाळ पर्यंत मोलकरणीची वाट पाहिली मात्र मोलकरीण परत न आल्याने शेलार यांनी दागिने व पैसे ठेवलेले कपाट उघडून पाहिले असता कपाटातील दागिने व पैसे चोरीला गेल्याचे त्यांच्या निदर्शनास आले. त्यामुळे वैष्णवी नलावडे हिने दागिने व पैसे चोरून नेल्याची फिर्याद शेलार यांनी राजापूर पोलीस स्थानकात दाखल केली आहे. यामध्ये सोन्याचे मंगळसुत्र, कानातील रिंग, कुडी व रोख रक्कम असा सुमारे 14 हजार 750 रूपयांचा मुद्देमाल चोरीला गेल्याचे शेलार यांनी या फिर्यादीत नमूद केले आहे.
