खेलो इंडिया पॅरा स्पर्धा, दिल्ली 2025 : आजपासून रंगणार अॅथलेटिक्सचा थरार
वृत्तसंस्था/नवी दिल्ली
महाराष्ट्राच्या सुकांत कदम, प्रेम अले यांनी अपेक्षेप्रमाणे विजयी सलामी देत खेलो इंडिया पॅरा स्पर्धेचा उपांत्यपूर्व फेरीत मजल मारली आहे. दुसऱ्या पर्वाचे आज स्पर्धेचे शानदार उद्घाटन पेंद्रिय क्रीडामंत्री मनसुख मंडविया यांच्या हस्ते झाले. नवी दिल्लीच्या इंदिरा गांधी क्रीडा संकुलातील जिम्नॅस्टिक्स हॉलमध्ये सुरू असलेल्या पॅरा बॅडमिंटनमध्ये महाराष्ट्राच्या खेळाडूंनी सकाळपासूनच दमदार कामगिरीचे प्रदर्शन घडविले. एस एल 4 गटात सांगलीच्या सुकांत कदमने महाराष्ट्राच्याच निलेश गायकवाडचा 21-10, 21-19 सेटने पराभव केला. जागतिक क्रमवारीत दुसऱ्या स्थानावर असणाऱ्या सुकांतने पहिला सेट सहजपणे जिंकून लढतीवर पकड घेतली होती. दुसऱ्या सेटमध्ये त्याला संघर्ष करावा लागला.
अनुभवी सुकांतने आघाडी कायम राखत विजयी सलामी दिली. पॅरीस ऑलिम्पिकमध्ये चमकदार कामगिरी करणाऱ्या सुकांत प्रथमच खेलो इंडिया पॅरा स्पर्धेत सहभागी झाला आहे. शुक्रवारी उपांत्यपूर्व फेरीत सुकांतची लढत छत्तीसगडच्या अभिजीत सकुजाविरूध्द रंगणार आहे. व्हिलचेअरच्या डब्ल्यू एच 1 गटात महाराष्ट्राच्या प्रेमकुमार अले यांनी उत्तरप्रदेशच्या सिराजउद्दीनवर सहज मात केली. 21-12, 21-14 सेटने प्रेमकुमार अले पहिली फेरी जिंकून उपांत्यपूर्व फेरीत प्रवेश निश्चित केला. सेनादलातून निवृत्त झाल्यानंतर पॅरा बॅडमिंटन खेळण्याचा श्रीगणेशा पुण्यातून केला. आंतरराष्ट्रीय स्तरावर 10 सुवर्ण जिंकण्याची कामगिरी करणारे प्रेमकुमार प्रथमच खेलो इंडिया पॅरा स्पर्धेत सहभागी झाले आहेत.
आजपासून अॅथलेटिक्सचा थरार
शुक्रवार 21 मार्चपासून अॅथलेटिक्सचा थरार रंगणार आहे. ऑलिम्पिक रौप्यपदक विजेता सचिन खिलारी दुखापतग्रस्त असल्याने दुसऱ्या स्पर्धेत खेळताना दिसणार नाही. गतस्पर्धेत खिलारीने सुवर्णपदक जिंकले होते. यंदा संदीप सलगर, भाग्यश्री जाधव, दिलीप गावीत या पॅरीस ऑलिम्पिकपटू अॅथलेटिक्सचे मैदान गाजविताना दिसतील.
