येळ्ळूर, हिंडलगा, खानापुरात परीक्षा केंद्रे : विद्यार्थ्यांनी लाभ घेण्याचे आवाहन
वार्ताहर/येळ्ळूर
865 सीमावासीय शिक्षक महाराष्ट्र राज्य मंचच्यावतीने होणाऱ्या राज्यस्तरीय सामान्यज्ञान स्पर्धा परीक्षेच्या केंद्रांतर्गत नियोजनाची बैठक येळ्ळूर येथे नुकतीच पार पडली. बैठकीच्या अध्यक्षस्थानी नवहिंद सोसायटीचे चेअरमन प्रकाश अष्टेकर होते. 865 सीमावासीय गावातील मराठी भाषिक विद्यार्थ्यांची स्पर्धा परीक्षाची परिस्थिती बघता त्यांना योग्य मार्गदर्शनाची गरज असल्याचे चित्र आहे. मातृभाषा कन्नड नाही म्हणून नोकरीत प्राधान्य नाही. आणि इंग्रजी तृतिय भाषा केल्याने त्याची पुढे प्रगती नाही, अशा कोंडीत सापडलेल्या विद्यार्थ्यांना आज स्पर्धा परीक्षांतूनच पुढे जावे लागणार आहे. प्राथमिक स्तरापासूनच अशा परीक्षांचा सराव केल्यास त्यांना भविस्यात संधी मिळेल, या हेतुने या स्पर्धा परीक्षेचे आयोजन होत असल्याचे यावेळी या मंचचे अध्यक्ष दशराथ सूर्यवंशी यांनी यावळी सांगितले.
शाळांनी विद्यार्थ्यांना परीक्षेची संधी द्यावी
रविवार दि. 22 डिसेंबर रोजी होणाऱ्या या परीक्षा बेळगाव व खानापूर तालुक्यातील विद्यार्थ्यांसाठी हिंडलगा हायस्कूल हिंडलगा, मराठी मॉडेल शाळा येळ्ळूर व ताराराणी हायस्कूल मराठा मंडळ खानापूर अशी तीन केंद्रे केली आहेत. या स्पर्धा 12 ते 2 या वेळेत होत असून या स्पर्धांचा लाभ बेळगाव व खानापूर तालुक्यातील शाळांनी आपल्या विद्यार्थ्यांना मिळवून द्यावा, असे आवाहन त्यांनी केले आहे. स्पर्धा परीक्षा मुलांसाठी तुम्ही आणल्या आहात, मुलांच्या सर्वांगिण विकासाचे कार्यक्रमासाठी आम्ही नेहमी अग्रेसर असतो. त्यामुळे या स्पर्धा परीक्षांसाठी जे जे सहकार्य लागेल ते निश्चित दिले जाईल, असे कार्यक्रमाचे अध्यक्ष प्रकाश अष्टेकर यांनी सांगितले. यावेळी मुख्याध्यापक बबन कानशिडे, नवहिंद क्रीडाकेंद्राचे अध्यक्ष शिवाजी सायनेकर, बी. एन. मजुकर, दुद्दाप्पा बागेवाडी, एस. बी. पाखरे यांनी आपले विचार मांडले. आभार विनायक पाटील यांनी मानले.
