केएलई एमबीए विभागाच्यावतीने लुमेन 1.0 चे आयोजन

बेळगाव : केएलई टेक्नोलॉजीकल युनिव्हर्सिटी डॉ. एम. एस. शेषगिरी कॅम्पसच्या एमबीए विभागाच्यावतीने विद्यार्थ्यांना व्यावहारिक शिक्षणाला चालना देण्याच्या उद्देशाने लुमेन 1.0 च्या पहिल्या आवृत्तीचे आयोजन करण्यात आले होते. हा कार्यक्रम सहभागी झालेल्यांना धोरणात्मक मार्केटिंग, आर्थिक नियोजन, ब्रँडिंग व विश्लेषणात्मक विचारसणीवर लक्ष केंद्रित करण्यासाठी आयोजित केला होता. अनुकरण, अध्ययन, सांघिक आव्हाने यासाठी लुमेन 1.0 द्वारे नवोदित व्यावसायिकांना त्यांची व्यावसायिक बुद्धिमत्ता आणि निर्णय घेण्याची क्षमता प्रदर्शित करण्यासाठी व्यासपीठ निर्माण केले होते. यामध्ये 36 संघांनी सहभाग घेतला होता. आधुनिक एमबीए कार्यक्रमांमध्ये प्रयोगाधारित शिक्षण महत्त्वाचे आहे. अनुभवात्मक शिक्षण, थिअरॉटिकल नॉलेज, व्यावसायिक आव्हानांची दरी भरून काढण्यासाठी लुमेन 1.0 ची रचना केली आहे. व्यवस्थापन शिक्षणाबाबत जागतिक कल आणि प्रकल्प आधारित शिक्षणात तंत्रज्ञानाचा समावेश करण्याच्या महाविद्यालयाच्या दूरगामी विचारसरणीचे मान्यवरांकडून कौतुक करण्यात आले. यावेळी डॉ. प्रयाग गोखले, डॉ. एस. एफ. पाटील यांच्यासह मान्यवर, विद्यार्थी, कर्मचारी उपस्थित होते. डॉ. वैभव बाडगी यांनी आभार मानले.