दोषींवर तातडीने कायदेशीर कारवाई करा : ग्राम पंचायत सदस्यांची जिल्हा पंचायत सीईओंकडे मागणी
बेळगाव : येळ्ळूर ग्राम पंचायतीमध्ये 2018-19 या आर्थिक वर्षात 14 व्या वित्त आयोग योजनेंतर्गत विविध विकासकामे राबविण्यात आली आहेत. यामध्ये मोठ्या प्रमाणात भ्रष्टाचार झाला आहे. याबाबत पंचायत राज खाते आणि कर्नाटक लोकायुक्तांकडे तक्रार देण्यात आली आहे. मात्र, अद्याप या प्रकरणाची चौकशी झालेली नाही. या प्रकरणाची सखोल चौकशी करून दोषींवर तातडीने कायदेशीर कारवाई करावी, अशी मागणी येळ्ळूर ग्राम पंचायत सदस्यांनी जिल्हा पंचायत सीईओ राहुल शिंदे यांची भेट घेऊन केली आहे. ग्राम पंचायत कार्यक्षेत्रामध्ये 29 विकासकामे राबविण्याच्या नावाखाली मोठ्या प्रमाणात निधी लाटण्याचा प्रकार घडला आहे.
यासाठी बेकायदेशीरपणे 54 लाखांची बिले तयार करण्यात आली आहेत. यामध्ये ग्राम पंचायत अध्यक्षा, पीडीओ, ता. पं. कार्यकारी अधिकारी व इतर साहाय्यक अभियंत्यांचाही सहभाग आहे. याबाबत जिल्हा पंचायतीकडेही तक्रार करून हा प्रकार निदर्शनास आणण्यात आला आहे. मात्र, प्रशासनाकडून या तक्रारीकडे दुर्लक्ष झाले आहे. या प्रकारामुळे गावातील विकासकामे खुंटली असून या प्रकरणाची चौकशी करावी आणि दोषींवर कारवाई व्हावी, अशी मागणीही सदस्यांनी केली आहे. यावेळी ग्रा. पं. उपाध्यक्ष प्रमोद पाटील, सदस्य सतीश पाटील, रमेश मेणसे, परशुराम परीट, शिवाजी नांदूरकर, लक्ष्मण छत्रन्नावर, शालन पाटील, मनीषा घाडी, अॅड. सुरेश उगारे आदी उपस्थित होते.
विकासाच्या नावाखाली परस्पर निधी लाटण्याचा प्रकार
विकासकामे राबविण्याच्या नावाखाली परस्पर निधी उकळण्याचा प्रकार घडला आहे. इतर सदस्यांना विश्वासात न घेता परस्पर हा बेकायदेशीर प्रकार करण्यात आला आहे. संबंधित सदस्यांचे सदस्यत्व रद्द करून या प्रकरणातील अधिकाऱ्यांवरही कारवाई करावी, अशी मागणी केली आहे.
