लोकसभा अध्यक्ष बिर्ला यांचे उद्या आमदारांना मार्गदर्शन

पणजी : लोकसभेचे अध्यक्ष ओम बिर्ला हे येत्या गुऊवार दि. 15 जून रोजी सकाळी 10.30 वाजता विधानसभा संकुलात सर्व आमदारांना मार्गदर्शन करणार आहेत. त्यानंतर ते इतर कार्यक्रमांतही सहभागी होणार आहेत. बिर्ला हे सकाळी गोव्यात दाखल होणार असून सभापती रमेश तवडकर त्यांचे विमानतळावर स्वागत करणार आहेत. त्यानंतर ते राजभवन येथे जाऊन राज्यपाल पी. एस. श्रीधरन पिल्लई यांची भेट घेणार आहेत. सकाळी 10.30 वाजता विधानसभा संकुलात त्यांचे ‘विकसित भारत : 2047 लोकप्रतिनिधींची भूमिका’ या विषयावर मार्गदर्शन होणार आहे. तवडकर हे स्वागत करणार असून  उपसभापती जोशुआ डिसोझा आभार प्रदर्शन करतील. मुख्यमंत्री डॉ. प्रमोद सावंत यांचेही त्यावेळी भाषण होणार आहे. बिर्ला हे दुपानंतर काणकोण येथील बलराम निवासी स्कूलला भेट देणार असून तेथे ते पुस्तकाचे प्रकाशन करतील. त्याचबरोबर ‘श्रमधाम’ योजने अंतर्गत बांधण्यात आलेली घरे बेघरांसाठी प्रदान करणार आहेत. त्यांना घराच्या चाव्या देतील, अशी माहिती तवडकर यांनी दिली. जुलैच्या तिसऱ्या किंवा चौथ्या आठवड्यात विधानसभेचे पावसाळी अधिवेशन होणार असून ते 18 ते 20 दिवस चालणार आहे. त्यात विविध विषयांवर चर्चा करण्यासाठी पुरेसा अवधी मिळणार असल्याचे सभापती तवडकर यांनी नमूद केले.