लायन्स क्लब-महावीर लिंब सेंटरतर्फे लाभार्थींना कृत्रिम पाय

बेळगाव : लायन्स क्लब ऑफ बेळगाव आणि महावीर लिंब सेंटर हुबळी यांच्या संयुक्त विद्यमाने दि. 26 रोजी 120 लाभार्थ्यांना कृत्रिम पाय बसविण्यात आले. इन्स्टिट्यूट ऑफ इंजिनियर्स हॉलमध्ये हा कार्यक्रम झाला. उपक्रमाच्या प्रारंभी इव्हेंट चेअरमन ला. रवींद्र काकती यांनी स्वागत केले. क्लबचे अध्यक्ष ला. दया शहापूरकर यांनी क्लबच्या उपक्रमांचा हेतू सांगितला. महावीर लिंब सेंटरतर्फे ला. रवींद्र क्रांती यांचा त्यांनी घेतलेल्या परिश्रमाबद्दल सत्कार करण्यात आला. प्रमुख पाहुणे म्हणून प्रांतपाल मनोज माने उपस्थित होते. या उपक्रमाला जय भारत फाउंडेशनचे सहकार्य लाभले. याप्रसंगी निमंत्रित पाहुणे म्हणून अशोक आयर्न वर्क्सचे जनरल मॅनेजर विनायक भोसले यांनी वंचितांच्या विकासासाठी खासगी क्षेत्राची भूमिका यावर मार्गदर्शन केले. त्याचप्रमाणे प्रांतपाल मनोज माणिक यांनी मार्गदर्शन केले व लायन्स क्लबच्या उपक्रमाची प्रशंसा केली. यावेळी अशोक आयर्नचे संचालक दयानंद कदम उपस्थित होते. लायन्स क्लब ऑफ बेळगावतर्फे या सर्वांचा सत्कार करण्यात आला. कृत्रिम पाय बसविण्याच्या या प्रकल्पाला 3.2 लाख रुपये खर्च आला आहे. सचिव गीता कित्तूर यांनी आभार मानले. याप्रसंगी लायन्सचे पदाधिकारी उपस्थित होते.