चिपळूण :
आगवे येथील लोटाची बाव या स्थानिक नावाने ओळखल्या जाणाऱ्या ठिकाणी विहिरीत पडलेल्या गव्याला बुधवारी वनविभागाने सुखरूप बाहेर काढून त्याला नैसर्गिक अधिवासात सोडून दिले. गवा विहिरीत पडल्याची माहिती पोलीस पाटील यांनी भ्रमणध्वनीवरून वनविभागाला कळवल्यानंतर सावर्डेचे वनपाल उमेश आखाडे व नांदगावंचे वनरक्षक अनंत मंत्रे यानी घटनास्थळी जाऊन पाहणी केली. गव्याच्या सुटकेसाठी वरिष्ठांचे मार्गदर्शन घेऊन जेसीबीच्या सहाय्याने विहिरीच्या एका बाजूने मार्ग करून त्याला विहिरीबाहेर सुखरूप काढले व नैसर्गिक अधिवासात मुक्त केले.
