यात्रेपूर्वी बेनकनहळ्ळीचा विकास करू

बेळगाव : बेनकनहळ्ळी येथील महालक्ष्मी यात्रा दि. 23 एप्रिल 2024 रोजी भरविण्यात येणार आहे. या पार्श्वभूमीवर काँग्रेस पक्षाचे जनरल सेक्रेटरी मृणाल हेब्बाळकर यांनी गावाला भेट देऊन यात्रेपूर्वी गावातील विकासकामे पूर्ण करण्यात येतील, असे आश्वासन दिले. महालक्ष्मी देवी यात्रा कमिटी व ग्रामस्थांची दि. 20 रोजी महालक्ष्मी मंदिरात बैठक बोलविली होती. यावेळी ग्रामस्थांनी गावातील विकासकामे राबविण्यावर चर्चा केली.  रस्ते, गटारी, वीज, पाणीपुरवठा आदी विषयांवर ग्रामस्थांनी चर्चा केली. दरम्यान या भागाच्या आमदार व बाल कल्याण विकास खात्याच्या मंत्री लक्ष्मी हेब्बाळकर यांच्यातर्फे त्यांचे पुत्र मृणाल हेब्बाळकर व बुडाचे माजी अध्यक्ष युवराज कदम यांनी हजेरी लावली होती. यावेळी हेब्बाळकर यांनी यात्रेपूर्वी गावातील विकासकामे पूर्ण करून गावचा सर्वांगीण विकास करण्यात येईल, असे आश्वासन दिले. याबद्दल ग्रामस्थांतर्फे मृणाल हेब्बाळकर व युवराज कदम यांचा सत्कार करण्यात आला. यावेळी देवस्की पंच, ग्रा. पं. सदस्य, अध्यक्ष, उपाध्यक्ष, ग्रामस्थ उपस्थित होते.