वंटे, फातर्पा येथील सापळय़ात बिबटा जेरबंद

कुंकळ्ळी : वंटे, फातर्पा येथे भरवस्तीत सव्वामीटर लांबीच्या बिबटय़ाला जेरबंद करण्यात वनरक्षकांना यश आले आहे. हा बिबटा सापळा लावल्यानंतर त्यात 15 दिवसांनी अडकला. बिबटय़ाच्या संचारामुळे वंटे परिसरातील लोक मागील तीन वर्षांपासून भीतीच्या छायेत वावरत होते. बिबटा जेरबंद झाल्याचे पाहून लोकांनी सुटकेचा निःश्वास सोडला. आतापर्यंत कित्येक वासरांचा या बिबटय़ाने फडशा उडविला होता. रानात गेलेली गुरे भीतीने सायंकाळ होताच वाडय़ावर येऊन ठाण मांडून बसू लागली होती. या बिबटय़ाचा संचार वाढल्याचे लक्षात येताच पाडी-बार्से वन कार्यालयात सरपंच महेश फळदेसाई यांनी पंचायतीमार्फत तक्रार नोंदवली होती. पाडी वन विभागाचे सज्जन जुवेकर, जानू फर्नांडिस, सज्जन नाईक यांनी त्यानंतर वंटे येथे भरवस्तीत सरपंच महेश फळदेसाई यांच्या घरामागे 200 मीटर अंतरावर सापळा बसविला व त्यात एक मोठा कुत्रा ठेवला. पण 15 दिवस बिबटा फिरकलाच नाही. शेवटी त्या जागी लहान कुत्र्याचे पिल्लू बांधण्याची युक्ती वनरक्षकांनी लढवली व गुरुवारी मध्यरात्री बिबटा सापळय़ात शिरला तो अडकला. शुक्रवारी सकाळी महेश फळदेसाई यांचे भाऊ शैलेश फळदेसाई हे आपल्या बागेत काजू गोळा करण्यासाठी गेले असता सापळय़ात बिबटा अडकला असल्याचे त्यांनी पाहिले. त्यांनी लगेच आपले भाऊ महेश यांना खबर दिली. लगेच महेश यांनी ही माहिती पाडी वन विभागाला कळवली व वनरक्षक वंटे येथे दाखल होऊन पिंजरा सुरक्षितरीत्या झाकून ठेवण्यात आला. दुपारी वन विभागाचे आरएफओ देविदास वेळीप, फॉरेस्टर सोनिया राणे दाखल झाल्या. या बिबटय़ाल हत्तीपाऊल, काणकोण येथे सोडण्यात येणार असल्याचे सांगण्यात आले आहे.